बालकांना न्याय व हक्क मिळाला पाहिजे

म. टा. प्रतिनिधी, नगर

कायदे केले जातात. परंतु कायद्याची माहिती समाजाला नसते. जिल्हा विधी सेवा प्राधिकारणामुळे कायद्याची माहिती जनतेला होत आहे. आपल्या बालसंपत्तीला योग्य मार्गदर्शनाची गरज असल्याने बालकांना हक्क व न्याय मिळाला पाहिजे. त्यासाठी लोकसहभाग गरजेचा आहे. त्यामुळे कायदे अधिक लोकाभिमुख होतील. कायदे मुले व नागरिकांपर्यंत घेऊन जाणे गरजेचे आहे, असे प्रतिपादन जिल्हाधिकारी अभय महाजन यांनी केले. नगर तालुक्यातील जेऊर येथे जिल्हा विधी सेवा प्राधिकरणाच्या वतीने जिल्हास्तरीय मुलांच्या न्यायहक्कासासाठी विशेष कायदेविषयक शिबिराचे आयोजन करण्यात आले. या शिबिराचे उद्घाटन जिल्हाधिकारी महाजन यांच्या हस्ते झाले. त्यावेळी त्यांनी मार्गदर्शन केले. प्रभारी प्रधान जिल्हा व सत्र न्यायाधीश विवेक हुड, जिल्हा न्यायाधीश पी. आर. भावके, पोलिस अधीक्षक रंजनकुमार शर्मा, जिल्हा परिषदेचे मुख्य कार्यकारी अधिकारी विश्वजीत माने, जिल्हा शल्य चिकित्सक बापूसाहेब गाडे, विधी सेवा प्राधिकरणाचे सचिव पद्माकर केस्तीकर, जिल्हा सरकारी वकील सतीष पाटील, बार असोसिएशनचे अध्यक्ष सुरेश ठोकळ, सरपंच मधुकर मगर आदी उपस्थित होते. जबाबदार नागरिक घडविण्य़ासाठी विविध कायदे केले आहे. मुलांच्या न्याय हक्कासाठी कायदे असून, त्याची सक्षमपणे अंमलबजावणी झाली पाहिजे. कायद्याची माहिती शेवटच्या घटकापर्यंत जाणे गरजेचे असल्याचे आवाहन न्यायाधीश हुड यांनी केले. या शिबिरात बालक स्नेहा विधी सेवा, बालकांचे संक्षण, शिष्यवृत्ती, वसतीगृह, मागासवर्गीय व दारिद्र रेषेखालील विद्यार्थ्यांसाठी कल्याणकारी योजना, अपंगांसाठी शिष्यवृत्ती योजना, मोफत व सक्ती शिक्षणाचा बालकाचा हक्क, बालगृह व शिशुगृह या योजनाबद्दल माहिती देण्यात आली आहे. त्यासाठी सर्व सरकारी विभागाच्या वतीने स्टॉल लावण्यात आले होते.