चास परिसरात मुलांची शाळेसाठी ‘ओढा’ताण

म. टा. वृत्तसेवा, नगर

तालुक्यातील चास शिवारातील भोर वस्ती, कांबळे वस्ती जवळून जाणाऱ्या चिमुकल्यांना शाळेत जाण्यासाठी ओढ्यातून जीव मुठीत धरून जावे लागते. ग्रामपंचायतीकडून दखल घेतली जात नसल्याने संतप्त पालकांनी सरपंच, उपसरपंचांना घेराव घालून तातडीने रस्ता बनवून देण्याची मागणी केली.

चासनजीक असलेल्या या दोन वस्त्यांवरील मुलांना शाळेसाठी ओढा ओलांडून जावे लागते. ओढ्याला जास्त पाणी आले तर पालकांना मुलांसोबत ओढा ओलांडून देण्यासाठी जावे लागते. मुले एकटी ओढ्यातून जाणे धोकादायक आहे. या ठिकाणच्या रहिवाशांकडून अनेक दिवसांपासून ग्रामपंचायतीकडे रस्ता तयार करून देण्याची मागणी होत होती. मात्र, ग्रामपंचायत प्रशासनाकडून दुर्लक्ष होत असल्याने संतप्त महिलांसह रहिवाशांनी सोमवारी ग्रामपंचायतीत जाऊन पदाधिकाऱ्यांना घेराव घातला. या ठिकाणच्या मुलांसाठी तातडीने रस्ता करण्यात यावा, अशी मागणी पालकांनी या वेळी केली. येत्या तीन दिवसांमध्ये रस्त्याचे काम सुरू झाले नाही तर घरातील मुलाबाळांसह नगर-पुणे रस्त्यावर आंदोलनासाठी उतरू, असा इशारा आंदोलकांनी पदाधिकाऱ्यांना दिला.

याबाबत सरपंच अनिता गायकवाड, दीपक कार्ले यांच्याशी संपर्क साधला असता ते म्हणाले की, रस्त्यासाठी भूसंपादनापासून अनेक अडचणी आहेत. तरीही पाऊस बंद झाल्यानंतर ग्रामपंचायत फंडातून रस्ता तयार करून देण्यात येईल.