आरोपींविरुद्ध २४ परिस्थितीजन्य पुरावे

नगर:कोपर्डीतील अल्पवयीन मुलीवर बलात्कार व खून खटल्यात तिन्ही आरोपींविरुद्ध २४ वेगवेगळे परिस्थितीजन्य पुरावे असल्याचा अंतिम युक्तिवाद विशेष सरकारी वकील अॅड. उज्ज्वल निकम यांनी केला आहे. या खटल्यात संतोष भवाळ व नितीन भैलुमे या दोन आरोपींचा कसा सहभाग आहे, याचा उलगडाही सरकारी पक्षाकडून युक्तिवादात करण्यात आला.

गुरुवारी व शुक्रवारी असा दोन दिवस सरकारी पक्षाकडून अंतिम युक्तिवाद करण्यात आला आहे. शनिवारीही सरकार पक्षाकडून युक्तिवाद करण्यात येणार आहे. या महिन्यातील शनिवारी हा चौथा शनिवार आहे. या दिवशी सार्वजनिक सुट्टी असली तरी या खटल्याचे कामकाज न्यायालयात होणार आहे. मुलीचा अनैसर्गिक मृत्यू, आरोपी शिंदे हा पळून जात असताना पाहणारे साक्षीदार, आरोपीचे रक्त असलेले कपडे, आरोपीविरुद्ध वैद्यकीय पुरावे, आरोपी शिंदे याच्या घरातून जप्त केलेल्या अश्लिल सीडी व मोबाइल फोन, घटनेच्या दोन दिवसआधी मुलीची झालेली छेडछाड, घाबरलेली मुलगी दोन दिवस शाळेत गैरहजर राहणे, घटनेच्या वेळी आरोपी शिंदेने भैलुमेला केलेला मिसकॉल, आरोपी शिंदेची मोटारसायकल आरोपी भवाळ व भैलुमे यांनी निर्जनस्थळी ठिकाणी ठेवली होती. त्यानंतर आरोपी फरार झालेले होते. यातून गुन्ह्याची साखळी निर्माण होत आहे, असा युक्तिवाद अॅड. निकम यांनी केला आहे.

दरम्यान, आरोपी संतोष भवाळकडून बचावाचे साक्षीदार घेण्यासाठी सर्वोच्च न्यायालयात फेरयाचिका दाखल करण्यात आली असल्याचा अर्ज अॅड. बाळासाहेब खोपडे यांनी न्यायालयात दाखल केला आहे. सरकारी पक्षाचे वकील अॅड. उज्ज्वल निकम यांच्यासह इतर पाच जणांना बचावाचे साक्षीदार म्हणून घ्यावेत, अशी आरोपीची याचिका ऑगस्ट महिन्यात सर्वोच्च न्यायालयाने फेटाळली होती.