सिव्हिल सर्जन डॉ. बुरुटे निलंबित

नगर : सिव्हिल हॉस्पिटलचे सिव्हिल सर्जन डॉ. पांडुरंग बुरुटे यांना सरकारने तडकाफडकी निलंबित केले आहे. बुरुटे यांच्यावर ही निलंबनाची कारवाई होण्यापूर्वी आरोग्य मंत्री डॉ. दीपक सावंत व औरंगाबाद आरोग्य विभागाच्या उपसंचालकांनी हॉस्पिटलची पाहणी करत येथील अस्वच्छतेवर नाराजी व्यक्त केली होती. त्यानंतर थोड्याच दिवसांत डॉ. बुरुटे यांच्या निलंबनाचे आदेश काढण्यात आले.
आरोग्य विभागाने निलंबनाचे आदेश दिले असले तरी कोणत्या कारणावरुन बुरुटे यांना निलंबित केले आहे, हे अद्याप स्पष्ट झालेले नाही. आरोग्य मंत्री सावंत व औरंगाबाद आरोग्य विभागाच्या उपसंचालकांच्या पाहणीत हॉस्पिटलमध्ये अस्वच्छता दिसून आली. या अस्वच्छतेवर त्यांच्याकडून नाराजी व्यक्त करण्यात आली.
जिल्हा रुग्णालयात रुग्णांची संख्या जास्त आहे. रुग्णांच्या वाढत्या संख्येच्या तुलनेत येथे कर्मचाऱ्यांचा तुटवडा आहे. त्यामुळे कार्यरत कर्मचाऱ्यांकडूनच काम करून घ्यावे लागत आहे. कर्मचारी भरतीसाठी प्रशासनाने प्रस्ताव उपसंचालकांना सादर केला होता. या प्रस्तावास मंजुरी देऊन कर्मचाऱ्यांची भरती झाली असती तर हॉस्पिटलमधील मनुष्यबळाची टंचाई कमी होण्यास मदत झाली असती, असे डॉ. बुरुटे यांनी सांगितले.

दौऱ्याची माहितीच नव्हती ः डॉ. बुरुटे

सिव्हिलमध्ये रुजू होऊन जेमतेम पाच सहा महिने झाले असताना थेट निलंबनाच्या कारवाईवर डॉ. बुरुटे यांनी आश्चर्य व्यक्त केले. आपल्या कार्यकाळात हॉस्पिटलमध्ये येणाऱ्या रुग्णांना दर्जेदार आरोग्य सेवा देण्याचा प्रयत्न केला. हॉस्पिटलच्या स्वच्छतेवर भर दिला. हॉस्पिटलची थकलेली घरपट्टी भरण्यासाठी वरिष्ठ स्तरावर पाठपुरावा करून एक कोटींचा निधी मंजूर केल्याचे त्यांनी सांगितले. आरोग्य मंत्र्यांच्या दौऱ्याची आपणाला काहीच माहिती देण्यात आली नाही. जिल्ह्याच्या आरोग्य विभागाचा नोडल अधिकारी असल्याने याबाबत माहिती मिळणे अपेक्षित होते तरीदेखील याबाबत माहिती देण्यात आली नसल्याचे डॉ. बुरुटे यांनी सांगितले.