काश्मीर दिनी स्वच्छतेची शपथ

म. टा. प्रतिनिधी, नगर
जम्मू-काश्मीर राज्य भारतात विलीन झाल्याचा दिन शहर जिल्हा भारतीय जनता पक्षाने बुधवारी (२६ ऑक्टोबर) येथे उत्साहात साजरा केला. या निमित्ताने समाजात देशभक्ती रुजविण्याची तसेच स्वच्छतेत प्रत्यक्ष सहभागासह नागरिकांमध्येही जनजागृती करण्याची शपथ घेण्यात आली. लक्ष्मीबाई कारंजा येथील शहर भाजप कार्यालयासमोर झालेल्या या कार्यक्रमात शहर जिल्हाध्यक्ष खासदार दिलीप गांधी यांच्यासह पदाधिकारी व कार्यकर्ते सहभागी झाले होते. ‘भारत माता की जय’ अशा घोषणाही यावेळी देण्यात आल्या.
भारताला स्वातंत्र्य मिळाल्यानंतर काश्मीरचे तत्कालीन राजे हरीसिंग यांनी जम्मू आणि काश्मीर राज्य २६ ऑक्टोबर १९४७ रोजी भारतात विलीन केले. त्याबद्दल शहर जिल्हा भाजपने आज येथे काश्मीर दिन साजरा केला. पक्ष कार्यालयासमोर काश्मीर दिनाचा फलक लावून खा. गांधी यांनी उपस्थित कार्यकर्त्यांना भारतीय लष्कर व सैनिकांप्रति सन्मान व अभिमान बाळगण्याची शपथ दिली. तसेच भावीपिढीवर व नवयुवकांवर देशभक्तीचे संस्कार होण्यासाठी प्रत्येक कार्यकर्ता आपल्या घरात एखाद्या स्वातंत्र्यसैनिकाचा अथवा शहीद वीर जवानाचा फोटो लावेल, देशवासियांत एकजूट निर्माण होण्यासाठी भाजपचे कार्यकर्ते तन-मन-धनाने योगदान देतील व देशविरोधी घटनेचे अथवा हिंसक, नक्षलवादी, आतंकवादी विचारधारणेचे समर्थन करणारांची आणि देशविरोधी घटनेत सामील होणारांची माहिती सुरक्षा यंत्रणेला देतील, असेही या शपथेत नमूद करण्यात आले होते. शहर चिटणीस किशोर बोरा, श्रीकांत साठे, उपाध्यक्ष जगन्नाथ निंबाळकर, अन्वर खान, विश्वनाथ पोंदे, वसंत राठोड, पियुष जग्गी, नितीन शेलार, गौरव गुगळे, मनेष साठे, सतीश शिंदे, बंटी डापसे, अज्जू शेख, अमृत बोरा, रोनक मुथा, कुणाल मांडोत, शशिकांत पालवे, ज्ञानेश्वर जंगम, अभय जामगांवकर, मिलिंद भालसिंग आदी यात सहभागी झाले होते.