स्वच्छता कर्मचाऱ्याचा सन्मान

म. टा. प्रतिनिधी, नगर
नगरच्या सुरळीत रस्ते वाहतुकीसाठी शाळांच्या वेळा बदलणे, प्रमुख चौकांमध्ये सीसीटीव्ही कॅमेरे, अमरधाममध्ये सुविधा आदींसह विविध नागरी प्रश्नांच्या सोडवणुकीसाठी पाठपुरावा करणाऱ्या येथील जागरूक नागरिक मंचाने कार्यालयाच्या उद‍्घाटनानिमित्त वयोवृद्ध स्वच्छता कर्मचारी सुंदराबाई मिसाळ यांचा सन्मान केला.
जागरूक नागरिक मंचचे सदस्य पुरुषोत्तम गारदे यांनी नवीपेठ कॉर्नर येथील स्वमालकीच्या दुकानाची जागा मंचाच्या संपर्क कार्यालयासाठी दिली असून, या कार्यालयाचे उदघाटन कोतवाली पोलिस ठाण्याचे पोलिस निरीक्षक अभय परमार यांच्या हस्ते झाले. नगरच्या ५२७व्या स्थापनादिनानिमित्त झालेल्या या कार्यक्रमास माजी महापौर अभिषेक कळमकर, नगरसेवक किशोर डागवाले, माजी सभापती नरेंद्र कुलकर्णी, जागरूक नागरिक मंचचे अध्यक्ष सुहासभाई मुळे, सचिव कैलास दळवी, उपाध्यक्ष सुनील पंडित आदींसह अन्य उपस्थित होते.
शहराच्या समस्या दूर करण्यासाठी व शहराला विकासाच्या वाटेवर नेण्यासाठी जागरूक नागरिक मंच करीत असलेले कार्य कौतुकास्पद असल्याची भावना पोलिस निरीक्षक परमार यांनी व्यक्त केली. प्रत्येक गावात दोन-पाच टक्के अनिष्ट प्रवृत्ती असतातच व त्यांच्यामुळेच गाव बदनाम होत असते. मात्र, अन्य ९५ टक्के जनता चांगली असते, त्यामुळे अनिष्ट प्रवृत्तीकडे दुर्लक्ष करीत पुढे चालण्याचे आवाहनही त्यांनी केले.