तापमानवाढीनंतर आता वावटळी

म. टा. प्रतिनिधी, नगर

सलग तीन दिवस पारा ४४ अंशांवर राहिल्यानंतर आता वावटळी (चक्राकार वारे) फिरण्यास सुरुवात झाली आहे. हवामान बदलाचा हा परिणाम असून आगामी मान्सूनसाठी हे चांगले लक्षण असल्याची माहिती हवामानतज्ज्ञांनी दिली. दरम्यान, नगर शहरात गुरुवारी दुपारी वावटळामुळे विजेचे खांब कोसळून सावेडी उपनगरातील वीजपुरवठा काही काळ खंडित झाला होता.

तापमानवाढीच्या झळा सहन केल्यानंतर अधूनमधून वारे वाहण्यास सुरुवात झाली आहे. दुपारच्या वेळी अचानक वावटळी तयार होऊ लागल्या आहेत. अचानक तयार होणारी वावटळ काही अंतरापर्यंत वेगावे जाऊन नंतर लुप्त होत असली तरी मधल्या काळात बरीच उलथापालथ होत आहे. रस्त्यावर तयार होणाऱ्या वावटळीचा दुचाकीस्वारांना, दुकानदारांना, फेरीवाल्यांना त्रास होत आहे. काही ठिकाणी किरकोळ नुकसानही होत आहे.

यासंबंधी अधिक माहिती देताना कृषी हवामानतज्ज्ञ डॉ. रामचंद्र साबळे म्हणाले, 'या वावटळी स्थानिक पातळीवर थोड्या फार त्रासदायक ठरत असल्या तरी एकूण मान्सून आणि हवामानावर त्यांचा काही परिणाम होत नसतो. एकाच शहराच्या विविध भागांत कमी-अधिक तापमान असते. तेव्हा काही ठिकाणी कमी दाबाचा पट्टा तयार होऊन आजूबाजूची हवा तिकडे खेचली गेल्याने चक्राकार वारे वाहतात. मान्सूनच्या दृष्टीने विचार केला तर हवामान बदलाचे हे चांगले संकेत आहेत. मान्सूनसाठी पोषक हवामान तयार होत असून मोठी वादळे आणि गारपीट झाली नाही तर मान्सून वेळेवर येणार हे नक्की स्पष्ट होते.'

गुरुवारी दुपारी एका मोठ्या वावटळीमुळे एमआयडीसीजवळ बोल्हेगाव भागात घरांचे पत्रे उडाले. ते जवळून जाणाऱ्या वीज कंपनीच्या मुख्य वाहिनीवर पडले. त्यामुळे खांब कोसळले आणि तारा तुटल्या. याच वाहिनीद्वारे सावेडी भागातील पाइपलाइन रोड परिसरात वीजपुरवठा केला जातो. भर दुपारी या भागातील वीजपुरवठा खंडित झाला. वीज कंपनीने तातडीने दुस्तीचे काम हाती घेऊन वीजपुरवठा सुरळीत केला.