२१ कॉलेज ‘१०० टक्के’

म. टा. प्रतिनिधी, नगर बारावीच्या परीक्षेचा निकाल बुधवारी जाहीर झाला असून नगर जिल्ह्यातील प्रत्यक्ष परीक्षा दिलेल्या ५७ हजार ७०८ विद्यार्थ्यांपैकी ५० हजार ४३५ विद्यार्थी उत्तीर्ण झाले आहेत. तसेच जिल्ह्यातील २१ कॉलेजांनी शंभर टक्के यश मिळवले असून मागील वर्षीच्या तुलनेत ही संख्या १३ ने घटली आहे. नेवासा, पारनेर व जामखेड मध्ये मात्र एकाही कॉलेजचा निकाल शंभर टक्के लागला नाही. जिल्ह्यात संगमनेर तालुक्याचा निकाल सर्वात चांगला लागला आहे. या तालुक्यातील परीक्षेला बसलेल्या ६ हजार ९२५ विद्यार्थ्यांपैकी तब्बल ६ हजार ३५१ विद्यार्थी म्हणजेच ९०.९५ टक्के विद्यार्थी उत्तीर्ण झाले आहेत. तर, सर्वात कमी निकाल नेवासा तालुक्याचा (७४.३५ टक्के) लागला आहे. शैक्षणिक वर्ष २०१३-१४ व शैक्षणिक वर्ष २०१४-१५ मध्ये देखील नेवासा तालुक्याचा निकाल जिल्ह्यात हा सर्वात कमी होता. नेवासा वगळता जिल्ह्यातील इतर १३ तालुक्यांचा निकाल ८० टक्क्यांपेक्षा जास्त लागला आहे. सर्वाधिक विद्यार्थी असलेल्या नगर शहर व तालुक्याचा निकाल ८३.८५ टक्के लागला आहे. नगर शहर व तालुक्यात ९ हजार ३०८ विद्यार्थ्यांनी परीक्षा दिली होती. त्यापैकी ७ हजार ९३७ विद्यार्थी उत्तीर्ण झाले आहेत. बारावीच्या निकालाच्या टक्केवारीमध्ये संगमनेर तालुक्याने बाजी मारली असली, तरी शंभरी गाठण्यात कर्जत तालुक्यातील सर्वात जास्त कॉलेज यशस्वी ठरले आहेत. याशिवाय नगर तालुक्यातील तीन व कोपरगाव, पाथर्डी, राहता, संगमनेर व श्रीगोंदा तालुक्यातील प्रत्येकी दोन कॉलेजांना शंभरी गाठता आली आहे. तर, अकोला, राहुरी, शेवगाव, श्रीरामपूर तालुक्यातील प्रत्येकी एका कॉलेजचा निकाल शंभर टक्के लागला आहे. यावर्षी निकालाची टक्केवारी तब्बल ६.९८ टक्क्यांनी घसरली असून मागील वर्षीच्या तुलनेत उत्तीर्ण होणाऱ्या विद्यार्थ्यांची संख्या कमी आहे.

शंभर टक्के निकाल लागलेली कॉलेज

अकोले तालुका ः शासकीय माध्यमिक व उच्च माध्यमिक आश्रमशाळा, पैठण. कर्जत तालुका ः श्री विठ्ठल माध्यमिक व उच्च माध्यमिक विद्यालय माहिजळगाव, आनंदराव फाळके पाटील ज्युनिअर कॉलेज कर्जत, न्यू इंग्लिश स्कूल कॉलेज ऑफ सायन्स कर्जत, श्री संत गजानन उच्च माध्यमिक विद्यालय कर्जत. कोपरगाव तालुका ः संजीवनी सैनिकी शाळा व ज्युनिअर कॉलेज सहजानंद नगर, संजीवनी ज्युनिअर कॉलेज. नगर तालुका ः श्री एन.डी.कासार पाटील आर्टस्, कॉमर्स अॅण्ड सायन्स ज्युनिअर कॉलेज वाळकी, ऑक्झिलीअम कॉनव्हेंट ज्युनिअर कॉलेज सावेडी, मातोश्री भागूबाई भामरे सायन्स ज्युनिअर कॉलेज रुईछत्तीशी. पाथर्डी तालुका ः शिवतेज ज्युनिअर कॉलेज मढी, आर्टस्, सायन्स अॅण्ड सायन्स ज्युनिअर कॉलेज पाथर्डी. राहता तालुका ः इंग्लिश मिडिअम स्कूल अॅण्ड ज्युनिअर कॉलेज लोणी, प्रवरा पब्लिक स्कूल प्रवरानगर. राहुरी तालुका ः गायत्री उच्च माध्यमिक विद्यालय देवळाली प्रवरा. संगमनेर तालुका ः न्यू इंग्लिश स्कूल अॅण्ड ज्युनिअर कॉलेज खांबे, ज्युनिअर कॉलेज चंदनापुरी. शेवगाव तालुका ः त्रिमूर्ती पब्लिक ज्युनिअर कॉलेज शेवगाव. श्रीगोंदा तालुका ः महादजी शिंदे ज्युनिअर कॉलेज ऑफ सायन्स श्रीगोंदा, श्री सिद्धेश्वर माध्यमिक व उच्च माध्यमिक हायस्कूल मांडवगण. श्रीरामपूर तालुका ः न्यु इंग्लिश स्कूल ज्युनिअर कॉलेज श्रीरामपूर.