खंडणीसाठी मित्रांकडूनच विद्यार्थ्याचा खून

मटा ऑनलाइन वृत्त । अहमदनगर

२० लाख रुपयांच्या खंडणीसाठी महाविद्यालयीन विद्यार्थ्याचे अपहरण करून त्याचा खून करण्यात आल्याची घटना श्रीगोंदा तालुक्यातील निमगाव खलू गावात उघडकीस आली आहे. या प्रकरणी पोलिसांनी चौघांना ताब्यात घेतले असून त्यातील काहीजण मृत विद्यार्थ्याचे मित्रच असल्याची माहिती मिळाली आहे. दौंड तालुक्यातील पाटसजवळील वायरलेस फाटा येथून पोलिसांनी अक्षय पानवकर याचा मृतदेह ताब्यात घेतला आहे.

अक्षय पानवकर हा विद्यार्थी शनिवारपासून बेपत्ता झाला होता. त्याच्या पालकांनी याची माहिती श्रीगोंदा पोलिसांना दिली होती. त्यानंतर पानवकर यांना खंडणीसाठी फोन आला. २० लाख रुपये द्या, नाहीतर तुमच्या मुलाला मारून टाकू; अशी धमकी देण्यात आली. त्यानंतर पोलिसांनी कसून चौकशी सुरू केली. अक्षय सोबत राहणारा बी. डी. सोनवणे या विद्यार्थ्याला ताब्यात घेऊन चौकशी करण्यात आली. तेव्हा त्यानं अपहरण व खुनाच्या कटाची कबुली दिली. चौघांनी मिळून अक्षयचा वायरलेस फाटा येथील एका खोलीत नेऊन खून केल्याची माहिती त्यानं दिली. इतर साथीदारांची माहितीही त्यानं दिली. त्यातील दोघे बारामतीचे असून एकजण गावातीलच आहे. आरोपीपैंकी दोघे विद्यार्थी असून अन्य मजुरी करणारे आहेत.

खंडणीसाठी फोन करण्याआधीच आरोपींनी अक्षयचा खून केल्याचे तपासात पुढे आहे. त्यामुळे खून खंडणीसाठी केला की आणखी काही कारण असावे, याचा तपास सुरू आहे. २० लाखांची खंडणी देण्याइतकी पानवकर कुटंबाची आर्थिक परिस्थिती नाही. त्यामुळे याबद्दल संशय व्यक्त असून नेमके कारण तपासानंतरच स्पष्ट होईल, असे पोलिसांना सांगितले.