कामरगावला वीज वितरण कंपनीचा ढिसाळ कारभार

नगर :

तालुक्यातील कामरगाव व परिसरात महावितरण कंपनीच्या दुर्लक्षामुळे प्राथमिक शाळेच्या आवारातच विजेचा तारा उघड्या पडल्या आहेत. गावातील तारा थेट हाताला लागत असल्याने मोठी दुर्घटना होण्याची शक्यता निर्माण झाली आहे. कंपनीच्या अधिकाऱ्यांकडे याबाबत तक्रारी करूनही दखल घेतली जात नसल्याने कंपनीचे अधिकारी दुर्घटना होण्याची वाट पाहत आहेत का, असा सवाल ग्रामस्थांकडून केला जात आहे.

कामरगाव जिल्हा परिषद प्राथमिक शाळेच्या आवारात विद्युत रोहित्र आहे. देखभालीअभावी रोहीत्राची दूरवस्था झाली आहे. मुख्य वीजवाहक तारांचे आवरण खराब होऊन कुजले आहे. वीजवाहक तारा उघड्या पडल्या आहेत. शाळेत येणारी याच ठिकाणी खेळत असतात. रोहित्राजवळून अंगणवाडीची लहान मुले ये-जा करत असतात. सध्याच्या पावसाळी वातावरणात दुर्घटनेची शक्यता जास्त असते. या परिसरात अनेकांचा वावर असल्याने मोठी दुर्घटना होण्याची भीती आहे. गावातील कामक्षा माता मंदिर परिसराच्या रस्त्यावर विजेचे खांब आहेत. या खांबांवरील असंतुलनामुळे निखळून खाली वाकल्या आहेत. पायी चालणाऱ्या माणसाच्या हाताला लागू शकतात. या प्रकारामुळे जीवितहानी होऊ शकते. नगर-पुणे राज्यमार्गासह इतर ठिकाणीही अशीच परिस्थिती आहे. ग्रामस्थांनी वितरण कंपनीच्या कर्मचाऱ्यांकडे तक्रारी करूनही दखल घेतली जात नाही. वितरण कंपनीच्या अधिकाऱ्यांनी याप्रकरणाकडे लक्ष घालून तातडीने कार्यवाही करण्याची मागणी सामाजिक कार्यकर्ते तुकाराम कातोरे, प्रफुल्ल भुजबळ, अमित साठे, शुभम महापुरे, जाधव यांच्यासह ग्रामस्थांनी केली आहे.