अतिक्रमण विरोधी पथकाला धमकी

म. टा. प्रतिनिधी, नगर
उच्च न्यायालयाच्या औरंगाबाद खंडपीठाच्या आदेशाने शहरातील रुग्णालयांच्या पार्किंग जागांवर असलेली बांधकामे हटविण्याचे काम करीत असलेल्या मनपाच्या अतिक्रमण निर्मूलन पथकाचे प्रमुख सुरेश इथापे यांना शिवीगाळ, धक्काबुक्की करून दमबाजीसह जीवे मारण्याची धमकी देण्याची घटना सोमवारी दुपारी प्रेमदान चौकातील डॉ. प्रदीप तुपेरे यांच्या नवोदय सर्जिकल या रुग्णालयासमोर घडली. या घटनेनंतर अतिक्रमण निर्मूलन पथकासह मनपा कामगार संघटनेने काम बंद करून येथेच धरणे आंदोलन केले.
खंडपीठाच्या आदेशाने शहरातील ५२ रुग्णालयांच्या पार्किंग जागांतील अतिक्रमणे काढण्याची मोहीम मनपाने सुरू केली आहे. सोमवारी पुन्हा नव्याने ही मोहीम सुरू करण्यात आली. डॉ. प्रदीप तुपेरे यांच्या नवोदय सर्जिकल रुग्णालयातील अतिक्रमित बांधकामे काढल्यानंतर व राहिलेले काढून घेण्याची ग्वाही डॉ. तुपेरे यांनी दिल्यानंतर जवळच्या डॉ. शंकर शेळके यांच्या रुग्णालयावरील कारवाईसाठी गेलेल्या पथकाला काहीजणांनी अडवून इथापे यांच्याशी वादावादी केली. इथापे यांची गचांडी पकडून त्यांना दमबाजी व शिवीगाळही झाली. तसेच हात-पाय तोडून जीवे मारण्याची धमकीही त्यांना देण्यात आली. कामगार संघटनेचे अध्यक्ष अनंत लोखंडे हेही घटनास्थळी आल्याने त्यांनी कामगार एकजुटीच्या जोरदार घोषणा दिल्या. त्यानंतर सर्वांनी तेथेच धरणे आंदोलन सुरू केले. दमबाजी करणाऱ्या संबंधितांविरुद्ध गुन्हा दाखल व्हावा, संबंधित डॉक्टरचा वैद्यकीय व्यवसाय परवाना रद्द व्हावा तसेच न्यायालयाच्या आदेशाने सुरू असलेल्या अतिक्रमण हटाव मोहिमेस विरोध करून न्यायालयाचा अवमान केला असल्याने खंडपीठास याबाबतचा अहवाल देण्याची मागणी या वेळी करण्यात आली. मनपा आयुक्त घन:श्याम मंगळे व अतिरिक्त आयुक्त विलास वालगुडे यांनी कर्मचाऱ्यांची भेट घेऊन आवश्यक कार्यवाहीची ग्वाही दिल्यानंतर आंदोलन मागे घेण्यात आले.
रुग्णांचे नातेवाईक असल्याचा दावा
डॉ. तुपेरे यांच्या रुग्णालयावरील कारवाईनंतर इथापे डॉ. शेळके रुग्णालयाकडे गेले असताना तेथे दोन-तीनजण आले व डॉ. तुपेरे यांच्या रुग्णालयावर तुम्ही कारवाई कशी केली, तेथे आमचे रुग्ण नातेवाईक होते, असे ते म्हणाले. त्यावर इथापे यांनी, संबंधित रुग्ण दाखविण्याबाबत त्यांना सुचवले. त्यानंतर हे सगळे पुन्हा डॉ. तुपेरेंच्या रुग्णालयासमोर आले व तेथेच जोरदार वादावादी सुरू होऊन इथापेंना शिवीगाळ, दमबाजी व जीवे मारण्याची धमकी दिली गेल्याचे इथापे यांनीच सांगितले.

संबंध नसल्याचा तुपेरेंचा दावा
प्रमुख इथापे यांना झालली शिवीगाळ व दमबाजी प्रकरणाशी आपला संबंध नसल्याचा दावा डॉ. तुपेरे यांनी केला. माझ्या रुग्णालयावरील कारवाई त्यांनी सुरू केल्यावर माझे वैद्यकीय साहित्य व अन्य यंत्रणा स्वतःहून काढून घेऊ देण्याची विनंती मी केली होती. इथापेंनी तशी परवानगी देऊन ते पुढे गेले होते. माझी व त्यांची कोणतीही हुज्जत वा वादावादी झाली नाही. त्यामुळे ज्या व्यक्तींनी ते केले असेल, त्यांच्यावर कारवाई केली जावी, असेही त्यांनी पत्रकारांशी बोलताना सांगितले. दरम्यान, या घटनेची माहिती समजताच डॉ. बापूसाहेब कांडेकर, डॉ. व्ही. एन. देशपांडे, डॉ. संदीप सुराणा व अन्य डॉक्टरांनी घटनास्थळी भेट दिली.

कामगार संघटनेचा आरोप

अतिक्रमण निर्मूलन विभागाद्वारे सुरू असलेली कारवाई खंडपीठाच्या आदेशाने सुरू असल्याने तिला विरोध करणे चुकीचे आहे, असे मनपा कामगार संघटनेचे अध्यक्ष अनंत लोखंडे म्हणाले. इथापे यांना शिवीगाळ करून दमबाजी व जीवे मारण्याची धमकी देणारांना संबंधित डॉक्टरांनीच बोलावले होते, त्यामुळे डॉक्टरांसह सर्व संबंधितांवर कठोर कारवाई झाली पाहिजे, अशी मागणीही त्यांनी केली.