डॉक्टरची कमाल! या यंत्राद्वारे स्पर्श न करता हात धुवा, करोना टाळा

अहमदनगरः करोनाचा संसर्ग रोखण्यासाठी हँडवॉश, सॅनिटायझर किंवा नळाच्या पाण्यानं हात स्वच्छ करतो. पण त्यासाठी हँडवॉश, सॅनिटायझरची बाटली आणि नळाला हात लावतो. त्यामुळं संसर्ग होण्याची भीती असते. त्यावर नगर तालुक्यातील वाळकी येथील प्राथमिक आरोग्य केंद्रातील वैद्यकीय अधिकाऱ्यानं उपाय शोधला आहे. त्यांनी एक यंत्रणा तयार केली आहे. हॅण्डवॉश, नळाला हात लावण्याची गरजच नाही. हात स्वच्छ करण्यासाठी वैद्यकीय अधिकाऱ्यानं फुट ऑपरेटिव्ह हॅंडवॉश आणि सॅनिटायझर यंत्रणा तयार केली आहे. सध्या आरोग्य केंद्रातील कर्मचारी आणि केंद्रात येणारे रुग्ण या यंत्रणेचा वापर करत आहेत.

वाळकी येथील प्राथमिक आरोग्य केंद्रात डॉ. अनिल ससाणे हे वैद्यकीय अधिकारी आहेत. करोनाचा संसर्ग रोखण्यासाठी नागरिक हँडवॉश, नळ सोडण्यासाठी हाताचा वापर करतात. सॅनिटायझर घेण्यासाठी बाटलीला हात लावावा लागतो. त्यातून करोनाग्रस्त व्यक्तीने हात लावला असल्यास करोनाचा संसर्ग होण्याची भीती असते. त्यावर ससाणे हे पर्याय शोधत होते. त्याचवेळी एका लष्करी अधिकाऱ्यानं हात धुण्यासाठी फुट ऑपरेटिव्ह यंत्रणा विकसित केल्याचा व्हिडिओ त्यांनी व्हॉट्सअॅपवर पाहिला. हा व्हिडिओ पाहिल्यानंतर अशीच यंत्रणा तयार करण्याची कल्पना ससाणे यांना आली. त्यांनी स्थानिक फॅब्रिकेशन करणाऱ्याची व एका पेट्रोलपंप चालकाची मदत घेऊन लोखंडी, पाइप, प्लॅस्टिक पाइप, लोखंडी स्टॅण्डचा वापर करून फूट ऑपरेटिव्ह हँडवॉश व सॅनिटायझर यंत्रणा विकसित केली आहे. वैद्यकीय कर्मचारी किंवा रुग्ण हा प्राथमिक आरोग्य केंद्रात आल्यानंतर तो प्रथम पायाने पॅडल दाबून हँडवॉश लिक्विड हातात घेतो. त्यानंतर हात धुण्यासाठी पायाने पॅडल दाबल्यानंतर नळ सुरू होऊन पाण्याने हात धुतो. त्यानंतर आरोग्य केंद्रात प्रवेश केल्यावर या यंत्रणेच्या साह्यानं सॅनिटायझरही घेतले जात आहे. डॉक्टरांनी तयार केलेल्या यंत्रणेचे प्रशासकीय अधिकारी, नागरिक कौतुक करत आहेत.

नवी मुंबईत आयटी कंपनीच्या १९ कर्मचाऱ्यांना करोना

डॉक्टरांवर हल्ला केल्यास मिळणार 'या' शिक्षा

करोनाबाधित महिलेनं दिला बाळाला जन्म