नगर: होम क्वारंटाइन शिक्का मारण्यासाठी गेलेल्या कर्मचाऱ्याला बेदम मारहाण

अहमदनगर: शहरातून नगरमध्ये आलेल्या एका व्यक्तीच्या हातावर क्वारंटाइन शिक्का मारण्यासाठी गेलेल्या कर्मचाऱ्याला संबंधित व्यक्तीने व त्याच्या दोन मुलांनी बेदम मारहाण केल्याचा धक्कादायक प्रकार घडला आहे. कोपरगाव तालुक्यातील दडे कोरहाडे गावात रविवारी रात्री ही घटना घडली. या प्रकरणी लिपिक रवींद्र नारायण देशमुख यांच्या तक्रारीवरून तिघांविरोधात गुन्हा नोंदवण्यात आला आहे.

करोनाच्या भीतीनं शहरातील अनेक जण ग्रामीण भागात येऊन राहत आहेत. या सर्वांवर आरोग्य, महसूल व पोलीस प्रशासनाचं लक्ष आहे. बाहेरगावाहून आलेल्यांच्या हातावर क्वारंटाइनचे शिक्के मारण्यात येत आहेत. कोपरगावमधील दडे कोरहाडे या ठिकाणी ५५ वर्षीय व्यक्ती कल्याण येथून आली असल्याची माहिती तहसील प्रशासनाला मिळाली होती. त्यामुळे एक पथक या गावात आले होते. बाहेरगावाहून आलेल्या व्यक्ती व त्याच्या दोन्ही मुलांनी तोंडाला मास्क किंवा रुमाल बांधलेले नव्हते. तिघे जण निष्काळजीपणे वागत होते. याबाबत लिपिक व इतर कर्मचारी त्यांना समजावून सांगत होते. मात्र, आम्हाला काही झालेले नाही, तुम्ही येथून निघून जा, असे ते तिघे सांगू लागले. त्यावेळेस प्रशासनाने त्यांची समजूत काढली. बाहेरून आलेल्या व्यक्तीच्या हातावर शिक्का मारणे गरजेचे असल्याचे लिपिक यांनी सांगितल्यानंतर तिघांनी त्यांना धक्काबुक्की करून मारहाण केली. या प्रकरणी लिपिक देशमुख यांच्या फिर्यादीवरून तिघांविरोधात सरकारी कामात अडथळा आणणे, जिल्हाधिकाऱ्यांच्या आदेशाचे उल्लंघन करणे प्रतिबंध कायदा १८९७ नुसार कोपरगाव पोलीस ठाण्यात गुन्हा नोंदवण्यात आला आहे.

मुंबई: वरळी-कोळीवाड्यात ४ करोना संशयित; परिसर सील

सरकारचा मोठा दिलासा; ७०,००० बेघरांना निवारा

राज्यातील करोनाग्रस्तांचा आकडा २१५ वर

करोना Live: मुंबईतील वरळी कोळीवाडा सील