जागरूक नागरिक मंचाने व्यक्त केले मत
नगर : महापालिकेच्या नगरसेवकांनी टेंडरची कागदपत्रे चाळत न बसता आपल्या प्रभागातील मालमत्ता कर थकबाकीच्या वसुलीला चालना देण्याची गरज आहे, असे मत व तशी मागणी जागरूक नागरिक मंचाने केली आहे. यासंदर्भात मंचाचे अध्यक्ष सुहासभाई मुळे यांनी महापालिका आयुक्तांना पत्र दिले असून प्रभागनिहाय बड्या थकबाकीदारांविरोधात नगरविकास मंत्रालय व न्यायालयात जाण्याचा इशारा दिला आहे.
संकलित कर थकबाकी वसुलीसाठी तृतीयपंथीयांसह ढोल-ताशे-बँडचा गजर करण्याचा निर्णय महापालिका प्रशासनाने घेतला आहे. या पार्श्वभूमीवर जागरूक नागरिक मंचाने या प्रकाराची खिल्ली उडवली आहे. 'प्रभाग अधिकारी व वसुली कर्मचारी मिळून दीडशेवर जणांच्या पगारावर मोठा आकडा पालिका खर्च करते, या आकड्याला न्याय देऊन अधिकारी व कर्मचाऱ्यांनी वसुलीत आपला पुरुषार्थ दाखवला तर तृतीयपंथीयांसह ढोल-ताशे व बँडची मदत घ्यावी लागणार नाही,' असे स्पष्ट करून मुळे यांनी म्हटले आहे की, 'महापालिकेकडे प्रभाग निहाय मालमत्ताधारकांकडील थकबाकीची माहिती जागरूक नागरिक मंचाद्वारे माहिती अधिकारात मागितली गेली आहे. या माहितीनंतर कोणते विशिष्ट प्रभाग वर्षानुवर्षे थकबाकीत आहेत, हे स्पष्ट होणार आहे. वर्षानुवर्षे प्रामाणिक करदात्यांच्या जीवावर थकबाकीदारांची झुंड पोसली जात असेल तर तो प्रामाणिक करदात्यांवर अन्याय असल्याने त्याविरोधात कायदेशीर कारवाईसाठी नगरविकास मंत्रालय तसेच न्यायालयात जाणार आहोत,' असेही त्यांनी स्पष्ट केले.
नगरसेवकांना आवाहन
'आपल्या प्रभागात कुणाची व किती थकबाकी आहे याची कागदपत्रे नगरसेवकांनी चाळावी व त्यांच्याकडे जाऊन त्यांना पैसे भरण्य़ास सांगितले पाहिजे. निवडणुकीच्या वेळेला हात जोडण्यासाठी व मतांसाठी त्यांचे उंबरे झिजवले असल्याने आता वसुलीसाठी एकदा तरी त्यांचे उंबरे झिजवले तर वसुलीमध्ये प्रभागनिहाय चांगला परिणाम होईल व ते खऱ्या अर्थाने 'नगरसेवक' या शब्दाला न्याय देतील,' असे स्पष्ट करून मुळे म्हणाले, 'प्रामाणिकपणे वसुलीचे काम करणाऱ्या अधिकारी व कर्मचाऱ्यांना प्रशासनाने नैतिक बळ दिले पाहिजे. वसुली कारवाईत फोन करून अडथळा आणणाऱे राजकीय नेते वा नगरसेवकांच्याविरोधात अपात्रतेची कारवाई प्रशासनाने केली पाहिजे,' असेही त्यांनी सांगितले.
--
'त्यांची'ही नावे लावा
'महापालिका थकबाकीदारांची नावे व त्यांच्या थकीत रकमांचे फ्लेक्स प्रभागांतील प्रमुख चौकांतून लावणार असली तरी या फ्लेक्सवर संबंधित प्रभाग अधिकारी व वसुली अधिकाऱ्यांचे तसेच त्या प्रभागांतील नगरसेवकांचीही नावे ठळकपणे लिहावीत. तसेच, महापालिका अधिनियमातील तरतुदीनुसार मालमत्ता जप्ती वा नळ कनेक्शन्स तोडण्यासारखी कारवाई केली जावी. वसुली काम प्रामाणिकपणे न करणाऱ्या अधिकारी-कर्मचाऱ्यांवरही कारवाई केली जावी,' अशी मागणीही जागरूक नागरिक मंचाने केली आहे.
--