मुलीवर अत्याचार करणाऱ्याला सक्तमजुरी

म. टा. प्रतिनिधी, नगर
नगर तालुक्यातील नांदगाव येथील अल्पवयीन मुलीवर लैंगिक अत्याचार केल्याप्रकरणी आरोपी मल्हारी सखाराम उमाप (वय २५, रा. नांदगाव) याला बारा वर्षाची सक्तमजुरी व दहा हजाराचा दंड अशी शिक्षा ठोठाविण्यात आली. जिल्हा न्यायाधीश सुवर्णा केवले यांनी हा निकाल दिला आहे. हा गुन्हा घडल्यानंतर वर्षभरात या खटल्याचा निकाल लागला आहे.
गेल्या वर्षी ३० जुलै रोजी अल्पवयीन मुलाने घरी कोणी नसल्याने मुलीला घरी भांडी घासण्यासाठी बोलावून घेतले होते. त्या ठिकाणी आरोपी मल्हारी उमाप आला. आरोपीने घरात मुलीवर अत्याचार केला. तर अल्पवयीन मुलगा घराबाहेर थांबला होता. मुलीने ही घटना आईला सांगितल्यानंतर आरोपी उमाप व अल्पवयीन मुलाविरुद्ध एमआयडीसी पोलिस स्टेशनला गुन्हा दाखल झाला होता. पोलिस उपनिरीक्षक स्वाती देवडकर यांनी दोषारोपपत्र दाखल केले होते. सरकार पक्षाच्या वतीने जिल्हा सरकारी वकील सतीश पाटील यांनी बाजू मांडत दहा साक्षीदार तपासले होते.
त्यात अत्याचारीत मुलगी, तिची आई, वैद्यकीय अधिकारी, तपासी अधिकारी यांची साक्ष महत्वपूर्ण ठरली. न्यायालयाने दोषी ठरवत बारा वर्षांची सक्तमजुरी व दहा हजार रुपयांचा दंड अशी शिक्षा सुनावली. दंडातील पाच हजार रुपयांची रक्कम पिडित मुलीला देण्याचे आदेश झाला. कोपर्डीनंतर काही दिवसांत हा गुन्हा घडला होता.