फटाक्यांची विक्री यंदा घटली

म. टा. प्रतिनिधी, नगर

जीएसटीमुळे आधीच अडचणीत सापडलेल्या फटाका मार्केटला सलग तीन दिवस झालेल्या एसटी संपाचादेखील फटका बसला आहे. एसटीच्या संपामुळे फटाका मार्केटमध्ये येणाऱ्या ग्रामीण भागातील ग्राहकांचे प्रमाण घटल्याने त्याचा परिणाम विक्रीवर झाला आहे. त्यामुळे मागील वर्षीच्या तुलनेत यंदा फटाक्यांच्या विक्रीमध्ये प्रचंड घट झाली आहे.

दिवाळीच्या सणानिमित्त फटाक्यांची बाजारपेठ नगरमध्ये दसऱ्यानंतर लगेच सज्ज झाली होती. परंतु, यंदा जीएसटीमुळे फटाक्यांचे भाव वाढले होते. त्यातच ऑक्टोबर महिन्याच्या दुसऱ्या आठवड्यामध्ये सलग पावसाने हजेरी लावल्यामुळे दिवाळी खरेदीसाठी येणाऱ्या ग्राहकांची संख्याही घटली होती. पाऊस उघडल्यानंतर खरेदीसाठी येणाऱ्या ग्राहकांची संख्या वाढेल, असा अंदाज फटाके विक्रेत्यांना होता. प्रत्यक्षात मात्र सोमवारी मध्यरात्रीपासून एसटीचा संप सुरू झाल्यामुळे ग्रामीण भागातील ग्राहकांच्या संख्येवर त्याचा परिणाम झाला आहे. याबाबत दि अहमदनगर फटाका व्यापारी असोसिएशनचे अध्यक्ष कैलास गिरवले यांनी सांगितले, 'जीएसटी व एसटी संपामुळे फटाके खरेदीला फारसा प्रतिसाद मिळाला नाही. नगरच्या मार्केटमध्ये नगर तालुक्यातील गावांसह पारनेर, राहुरी तालुक्यांतील गावांतील ग्राहक फटाके खरेदी करण्यासाठी येत असतात. परंतु, दिवाळी काळात एसटीचा संप सुरू झाल्यामुळे या ग्राहकांची संख्या घटली आहे.'

तर, फटाक्यांचे विक्रेते नितीन भुसारी यांनी सांगितले, 'जीएसटी व नोटाबंदीमुळे आधीच फटाका मार्केटमध्ये ग्राहकांची गर्दी ओसरली होती. त्यातच एसटीचा संप व ऑक्टोबरमध्ये झालेला पाऊस यांचाही परिणाम मार्केटवर झाला. मागील वर्षीच्या तुलनेत जवळपास ३० ते ४० टक्क्यांनी फटाक्यांची विक्री कमी झाली आहे.'