सोने लुटल्याप्रकरणी तिघांना अटक
म. टा. प्रतिनिधी, नगर
नगर शहरातील गंजबाजार येथे सराफ व्यावसायिकाकडे कारागीर म्हणून काम करणाऱ्या मजुराकडून दहा तोळे सोने लुटल्याच्या गुन्ह्यात कोतवाली पोलिसांनी तपास करून तीन आरोपींना अटक केली. या गुन्ह्यात हिंदू राष्ट्र सेनेचा कार्यकर्ता व माजी पदाधिकारी परेश चंद्रकांत खराडे (रा. दातरंगे मळा, नालेगाव, नगर) याचे नाव निष्पन्न झाले असून, तो फरारी झाला आहे. पोलिस त्याचा शोध घेत आहेत. या गुन्ह्यांत आरोपींची संख्या वाढल्याने दरोड्याचे कलम लावण्यात आले आहे.
तीन दिवसांपूर्वी गंजबाजारात सराफ कारागीर संजित माणिक मंडल यांच्याकडील दहा तोळे सोने चार जणांनी हिसकावून नेले होते. याप्रकरणी कोतवाली पोलिस स्टेशनला गुन्हा नोंदविला होता. पोलिस उपनिरीक्षक शिवाजी नागवे यांनी तपास करून नगरमधून सचिन सुभाष वाळके (रा. टांगेगल्ली नालेगाव), कलमेश राजेंद्र नवले (वय २२, कुंभारगल्ली), अक्षय बाबासाहेब दातरंगे (वय १९ रा. सातपुते तालीम, नालेगाव) या तिघांना अटक केली. या तिघांना प्रथम वर्ग न्यायदंडाधिकारी यांच्यासमोर हजर केले असता गुन्ह्याच्या तपासासाठी तीन नोव्हेंबरपर्यंत पोलिस कोठडी सुनाविण्यात आली. या गुन्ह्यात परेश चंद्रकांत खराडे, बादशहा (पूर्ण नाव नाही) या दोघांची नावे निष्पन्न झाली असून, हे दोघे फरारी झाले आहेत. त्यांचा शोध घ्यायचा असल्याचे नागवे यांनी न्यायालयासमोर सांगितले. हिंदू राष्ट्र सेनेच्या खराडे याला काही दिवसांपूर्वी अल्पवयीन मुलीचा विनयभंग केल्याचा गुन्ह्यात अटक करण्यात आली होती. या गुन्ह्यात जामीन मिळाल्यानंतर त्याने दरोड्याचा गुन्हा केला आहे.