आमदार जगतापांनी टोलवले चेंडू; वाडिया पार्कवर टर्फ विकेटची पुन्हा ग्वाही
म. टा. प्रतिनिधी, नगर
विधान परिषदेचे आमदार व जिल्हा क्रिकेट असोसिएशनचे अध्यक्ष आमदार अरुण जगताप, अतिरिक्त पोलिस अधीक्षक जयंत मीना व नगरच्या प्रसिद्ध स्नेहालय संस्थेचे संस्थापक डॉ. गिरीश कुलकर्णी यांनी गुरुवारी वाडिया पार्क मैदानावर क्रिकेट खेळून नगरच्या प्रसिद्ध क्रॉम्प्टन करंडक क्रिकेट स्पर्धेचे आगळेवेगळे उद्घाटन केले. तिघांनीही चेंडू टोलवत क्रिकेट कौशल्याचे दर्शन घडवले. दरम्यान, वाडिया पार्क मैदानावर नव्या वर्षात टर्फ विकेट होणारच, असा शब्द आमदार जगताप यांनी क्रिकेटप्रेमींना दिला.
नगरमधील क्रॉम्प्टन ग्रीव्हज कंपनीद्वारे मागील ३२ वर्षांपासून लेदर बॉल क्रिकेट स्पर्धा घेतली जाते. यंदाच्या ३३ व्या स्पर्धेची सुरुवात गुरुवारी वाडिया पार्क मैदानावर झाली. यंदाच्या या स्पर्धेत मुलींच्या सहा क्रिकेट संघांमध्ये आधी तीन दिवस निमंत्रितांची ट्वेंटी-ट्वेंटी स्पर्धा होणार असून, त्यानंतर १९ वर्षाआतील मुलांच्या संघांची ट्वेंटी-ट्वेंटी स्पर्धा मॅटवर होणार आहे. या स्पर्धेत मुंबई, पुणे, सोलापुर, लातूर, नगर, तसेच पाथर्डी येथील मुलांचे १६ संघ सहभागी झाले आहेत.
वाडिया पार्क मैदानावर स्पर्धा उद्घाटनानिमित्त रामराव आदिक पब्लिक स्कूल (श्रीरामपूर) व निऱ्हाळी हायस्कूल (पाथर्डी) या मुलींच्या संघांचा सामना सुरू करण्यात आला. या वेळी सी. जी. पॉवर अँड इंडस्ट्रीयल सोल्युशन कंपनीचे उपाध्यक्ष एन. रमेशकुमार, तसेच संदीप तांबोळी, जिल्हा क्रिकेट असोसिएशनचे सहसचिव प्रा. माणिक विधाते, गणेश गोंडाळ, दिलीप अकोलकर, मिलिंद कुलकर्णी, संजय पारनाईक, प्रा. श्रीकांत निंबाळकर, विजय संकलेचा आदी उपस्थित होते.
..........
'टर्फ विकेट'ची ग्वाही
वाडिया पार्क मैदानावर क्रिकेटची टर्फ विकेट करण्याबाबत जिल्हाधिकारी राहुल द्विवेदी व जिल्हा क्रीडा अधिकारी उदय जोशी यांनी सकारात्मक प्रतिसाद दिला असून, या कामाची निविदाही प्रसिद्ध झाली आहे. त्यामुळे नव्या वर्षात येथे टर्फ विकेट होणार आहे व ती झाल्यावर येथे रणजी सामना घेण्याचा प्रयत्न असल्याचे आमदार जगताप यांनी स्पष्ट केले. क्रॉम्प्टन क्रिकेट स्पर्धेच्या सातत्यपूर्ण आयोजनाचेही त्यांनी कौतुक केले. अतिरिक्त पोलिस अधीक्षक मीना व डॉ. कुलकर्णी यांनीही क्रॉम्प्टन स्पर्धेचे कौतुक करताना क्रिकेट वा अन्य कोणत्याही खेळातील खेळाडूने खिलाडूवृत्ती जोपासण्याचे आवाहन केले. प्रास्ताविक एन. रमेशकुमार यांनी केले. सूत्रसंचालन आनंद कुलकर्णी यांनी केले, तर आभार संदीप तांबोळी यांनी मानले. स्पर्धेसाठी गणेश पेंडसे, श्रीराम कुलकर्णी, गौतम सुवर्णपाठकी, कपिल पवार व अन्य सदस्य परिश्रम घेत आहेत.
............