नगर : उजव्या हातातील ब्रशच्या साह्याने कॅन्व्हासवर शंकर-पार्वतीचे चित्र रेखाटणारे गणराय, अशी 'चित्रकार' रुपातील बाल गणेशाची मूर्ती येथील कलाकार हेमंत दंडवते यांनी साकारली आहे. शाडूमातीचा वापर करून ही मूर्ती साकारण्यात आली असून, ती पाहण्यासाठी गणेशभक्तांची गर्दी होत आहे.
गणेशोत्सव काळात दरवर्षी वेगवेगळ्या रुपातील मूर्ती चित्रकार हेमंत दंडवते साकारत असतात. यापूर्वी त्यांनी 'विठ्ठलरुपी गणपती', 'धान्यापासून गणपती', 'शाडू मातीपासून मोटारसायकल चालवणारा गणपती', 'पंचिंग टिकल्यांवर अष्टविनायक (मिनिएचर) काच', पुठ्ठा, खडू, आदींच्या माध्यमातून सामाजिक संदेश देणारे गणपती साकारले आहेत. यंदा दंडवते यांनी चित्रकार रुपातील गणरायांची मूर्ती साकारली असून, तिची उंची बारा इंच एवढी आहे. आपल्या आई-वडिलांची सेवा करा, त्यांची काळजी घ्या, त्यांचा आदर राखा, त्यांच्या शिकवणीचे पालन करा, असा सामाजिक संदेश या मूर्तीद्वारे देण्याचा प्रयत्न दंडवते यांनी केला असून ती पाहण्यासाठी गर्दी होत आहे.
.......