अकोले : शेतात पाणी भरण्यासाठी गेलेल्या मायलेकाचा विद्युत मोटारीत उतरलेल्या विजेच्या प्रवाहाचा धक्का बसून मृत्यू झाला. ही घटना बुधवारी (२६ जून) अकोले तालुक्यातील गर्दनी शिवारात घडली. संगीता दिलीप झोळेकर (वय ४२) व आविष्कार दिलीप झोळेकर (१६) अशी मृतांची नावे आहेत. या दुर्दैवी घटनेमुळे अकोले शहरासह गर्दनी गावावर शोककळा पसरली आहे.
अकोले येथील मॉडर्न हायस्कूलमध्ये क्रीडा शिक्षक म्हणून कार्यरत असणारे दिलीप झोळेकर यांची गर्दनी शिवारात वडिलोपार्जित शेतजमीन आहे. त्यांच्या पत्नी संगीता व मुलगा आविष्कार बुधवारी शेतात पाणी भरण्यासाठी गेले होते. साडेचार वाजेच्या सुमारास मोटार सुरू करण्यासाठी गेले असता ही दुर्दैवी घटना घडली. अविष्कार यावर्षी दहावी उत्तीर्ण झाला होता. योग क्रीडा प्रकारात त्याने आंतरराष्ट्रीय स्तरावर यश संपादन केले होते. मुलगा व पत्नी फोन उचलत नाही, म्हणून दिलीप झोळेकर यांनी आपल्या नातेवाइकांस फोन करून त्यांना शेतात जावयास सांगितले असता गर्दनी शिवारातील कतार पाइन येथे शेतात संध्याकाळी सहाच्या सुमारास त्यांचे दोघांचेही मृतदेह आढळले. त्यानंतर त्यांचे मृतदेह रात्री उशिरा अकोले येथील शासकीय रुग्णालयात शवविच्छेदन करण्यासाठी आणण्यात आले. गुरुवारी त्यांच्यावर शोकाकुल वातावरणात अंत्यसंस्कार करण्यात आले.