सरकारचे शिक्कामोर्तब होण्याची प्रतीक्षा; अंमलबजावणीचे नियोजनही सुरू
म. टा. प्रतिनिधी,
शहरातील २६ ठिकाणे शांतता क्षेत्र (सायलन्स झोन) म्हणून महापालिकेच्या आरोग्य विभागाने निश्चित केली आहेत. सरकारकडे तसा प्रस्ताव पाठवला असून, राजपत्रातील प्रसिद्धीद्वारे सरकारकडून त्यावरील शिक्कामोर्तब होण्याची प्रतीक्षा आहे. ही ठिकाणे शांतता क्षेत्र म्हणून अंतिम झाल्यावर तेथील सार्वजनिक शांतता राखण्यासाठी आवश्यक उपाययोजनांचे नियोजनही सुरू केले गेले आहे.
ध्वनि प्रदूषण व (नियमन व नियंत्रण) नियम २०१७ अन्वये नगरमधील शांतता क्षेत्र ठिकाणे निश्चित करून त्याचा प्रस्ताव पाठवण्याचे आदेश सरकारच्या नगरविकास विभागाने दिले होते. त्यामुळे आरोग्य विभागाने विशेष पथकाद्वारे शहराच्या सर्व भागांत फिरून तसेच पूर्वीच्या शांतता क्षेत्रांच्या ठिकाणी असलेल्या सद्यस्थितीची पाहणी करून नव्याने पहिल्या टप्प्यात शैक्षणिक संस्था, रुग्णालये व न्यायालये या वर्गवारीतील २६ शांतता क्षेत्रे निश्चित केली आहेत. यात १५ शाळा-महाविद्यालये, ९ रुग्णालये व २ न्यायालयांच्या परिसराचा समावेश आहे. औद्योगिक, व्यावसायिक परिसर व रहिवास परिसरासह अन्य वर्गवारीतील अशी क्षेत्रे निश्चित करण्याचेही कामही सुरू करण्यात आले आहे. त्याबाबतची कार्यवाही झाल्यानंतर त्याचाही प्रस्ताव अंतिम मंजुरीसाठी व राजपत्रात प्रसिद्धीसाठी नगरविकास विभागाला पाठवला जाणार आहे.
निश्चित केलेली ठिकाणे
शैक्षणिक संस्था - आठरे पाटील पब्लिक स्कूल (रेणुकानगर, एमआयडीसी), ऑक्झिलियम कॉन्व्हेंट माध्यमिक शाळा (पद्मावती पेट्रोल पंपासमोर, मनमाड रोड), समर्थ विद्यामंदिर प्रशाला (प्रोफेसर कॉलनी चौक, सावेडी), आनंद माध्यमिक विद्यालय (गुलमोहोर रोड, सावेडी), ना. ज. पाऊलबुद्धे माध्यमिक विद्यालय (नित्यसेवा, पाइपलाइन रोड, सावेडी), अहमदनगर कॉलेज (चांदणी चौक, औरंगाबाद रोड), जिल्हा परिषद प्राथमिक शाळा (केडगाव, नगर), जिल्हा परिषद प्राथमिक शाळा (स्टेशन रोड, नगर), ओयासिस इंग्लिश मीडियम स्कूल (रेल्वे स्टेशन रोड, शिवनेरी चौक, नगर), भाऊसाहेब फिरोदिया-न्यू इंग्लिश स्कूल-अशोकभाऊ फिरोदिया इंग्लिश मीडियम स्कूल-सविता रमेश फिरोदिया स्कूल (जुनी महापालिका कार्यालयाजवळ, नगर), रेसिडेन्शियल हायस्कूल-न्यू आर्ट्स महाविद्यालय (पोलिस हेडक्वार्टर समोर, नगर), सीताराम सारडा विद्यालय (तोफखाना, नगर), क्लेरा ब्रुस प्रायमरी स्कूल व गर्ल्स हायस्कूल (झेंडीगेट, नगर), चांद सुलताना हायस्कूल (माणिक चौक, नगर) व औद्योगिक प्रशिक्षण संस्था-शासकीय तंत्रनिकेतन (आयटीआय, बुरुडगाव रोड).
रुग्णालये - गुणे आयुर्वेद महाविद्यालय (टिळक रोड), जिल्हा सरकारी रुग्णालय (पत्रकार चौक), आनंदऋषीजी रुग्णालय (बुरुडगाव रोड), सिटीकेअर - साई एशियन हॉस्पिटल (तारकपूर), आरोग्यम - मॅक्सकेअर - काळोखे हॉस्पिटल (बिशप लॉईड कॉलनीसमोर, सावेडी), बाळासाहेब देशपांडे प्रसुतिगृह (आशा चित्रपट गृह चौक), स्वास्थ्य हॉस्पिटल (सिद्धार्थनगर), बुथ हॉस्पिटल - नर्सिंग स्कूल (जीपीओ मार्ग) व न्युक्लिअस हॉस्पिटल (बालिकाश्रम रोड).
न्यायालये - जुने न्यायालय - कामगार न्यायालय (आनंदीबाजार, पटवर्धन चौक, नगर) व जिल्हा न्यायालय (एसपी ऑफिस चौक, औरंगाबाद रोड). या २६ ठिकाणांच्या सर्व बाजूने १०० मीटरच्या परिसरात शांतता क्षेत्र घोषित करण्यात आले आहे.
टप्पे केले जाणार
नगरमध्ये पूर्वी ३५० वर शांतता क्षेत्रे होती. यात शाळा-महाविद्यालये १९४ व रुग्णालये १४० तसेच फार्मसी क्षेत्रात २, वैद्यकीय महाविद्यालये ३, आयटीआय महाविद्यालये २, नर्सिंग महाविद्यालये ३ व न्यायालये २ अशा तब्बल ३५० ठिकाणांचा समावेश होता. पण यातील बहुतांश ठिकाणे सार्वजनिक वाहतुकीच्या रस्त्यांवरील असल्याने तेथील शांतता क्षेत्र वातावरण राखण्यात अडचणी आहेत. त्यामुळे पहिल्या टप्प्यात केवळ शैक्षणिक, रुग्णालये व न्यायालये या तीनच क्षेत्रातील शांतता क्षेत्र निश्चित केली गेली आहेत.
ध्वनि नियंत्रण मर्यादा
ध्वनि प्रदूषण अधिनियमानुसार औद्योगिक परिसरात दिवसा ७५ डेसिबल व रात्री ७० डेसिबल आवाज अपेक्षित आहे. व्यावसायिक क्षेत्रात ६५ व ५५, निवास परिसरात ५५ व ४५ आणि शांतता क्षेत्र निश्चित केलेल्या ठिकाणांच्या परिसरात दिवसा ५० व रात्री ४० डेसिबल आवाज अपेक्षित आहे.
---