राष्ट्रीय चर्मकार महासंघाची निदर्शने
चर्मकार समाजाचे आराध्य दैवत विज्ञान व मानवतावादी संत गुरु रविदास महाराज यांचे तुघलकाबाद (दिल्ली) येथील मंदिर दिल्ली प्रशासनाने पाडल्याच्या निषेधार्थ ...
नगर : चर्मकार समाजाचे आराध्य दैवत विज्ञान व मानवतावादी संत गुरु रविदास महाराज यांचे तुघलकाबाद (दिल्ली) येथील मंदिर दिल्ली प्रशासनाने पाडल्याच्या निषेधार्थ राष्ट्रीय चर्मकार महासंघाच्या वतीने बुधवारी येथील जिल्हाधिकारी कार्यालयासमोर निदर्शने करण्यात आली. तुघलकाबाद येथील संत रविदास महाराजांच्या मंदिराची जमीन परत करून मंदिराचे पुनर्निमाण करण्याची मागणी या वेळी करण्यात आली.
दिल्ली व केंद्र सरकारने मंदिर पाडल्याच्या घटनेच्या निषेधार्थ महासंघाचे जिल्हाध्यक्ष राजेंद्र बुंदेले यांच्या नेतृत्वाखाली निदर्शने करण्यात आली. यात प्रदेशाध्यक्ष मीरा शिंदे, दिलीप कानडे, संतोष कांबळे, शोभा कानडे, सुभाष भागवत, अशोक कानडे, सुभाष सोनवणे, महादेव नन्नवरे, बाबासाहेब लोकरे, विशाल बेलपवार, बापूसाहेब देवरे, लक्ष्मण साळे, संजय सातपुते, रावसाहेब कानडे, रोहिदास एडके, सचिन वाघमारे, संतोष गायकवाड, देवीदास कानगे, गणेश कानगे, दिनेश परदेशी, संभाजी आहेर, संतोष त्रिंबके, किसन बुंदेले, कारभारी चिधे आदी सहभागी झाले होते.
तुघलकाबाद येथील संत रविदास महाराजांचे मंदिर प्राचीन व ऐतिहासिक होते. या मंदिराला दिल्ली सम्राट सिकंदर लोधी याने गुरू रविदास महाराजांना गुरु मानून गुरुदक्षिणेच्या रुपात बारा एकर जमीन दान दिली होती. त्यावर हे मंदिर उभे होते. याची सरकार दप्तरी नोंद आहे. तरीदेखील हे मंदिर पाडून चर्मकार समाजाच्या भावना दुखावण्यात आल्या आहेत. या मंदिराचा जीर्णोद्धार माजी उपपंतप्रधान (स्व.) बाबू जगजीवन राम यांनी केला होता. हे ऐतिहासिक मंदिर दिल्ली आणि केंद्र सरकारने संगनमत करून पाडले असल्याचे निवेदनात म्हटले आहे.
--