खरेदीसाठी ‘धनत्रयोदशी’चा मुहूर्त

म. टा. प्रतिनिधी, नगर
दिवाळी सणाला उत्साहात सुरूवात झाली असून मंगळवारी ‘धनत्रयोदशी’च्या मुहूर्तावर खरेदी करण्यासाठी ग्राहकांनी बाजारात गर्दी केली होती. खतावणी, सोने-चांदी यांच्यासोबतच वाहन खरेदी करणे ग्राहकांनी पसंत केले. याशिवाय प्रथेप्रमाणे व्यापाऱ्यांनी धन्वंतरी व चोपड्यांची पूजा केली.
सोमवारी वसुबारसने दिवाळी सणाला उत्साहात सुरुवात झाली आहे. मंगळवारी धनत्रयोदशीच्या दिवशी नागरिकांचा उत्साह कायम होता. यादिवशी खरेदी करण्यासाठी बाजारात गर्दी झाली होती. व्यापाऱ्यांनी परंपरेप्रमाणे रोजच्या व्यावसायिक जमा-खर्चाची माहिती लिहिण्यासाठी लागणारी खतावणीची खरेदी करण्यावर भर दिला. प्रामुख्याने मालाची आवक-जावक लिहिण्यासाठी लहान खतावणी (डबरा बूक), पैशांची देवाण-घेवाण लिहिण्यासाठी चार बंदी (नकल) तर ग्राहकांसोबत करण्यात आलेले व्यवहार लिहिण्यासाठी तीन बंदी (खरडा/लांब खतावणी) यांची खरेदी केली गेली. वैद्यकीय व्यवसायातील डॉक्टर आणि वैद्य मंडळींनी धन्वंतरीची पूजा करून धनत्रयोदशी साजरी केली. धनत्रयोदशीनिमित्त महिलांनी देखील अंगणामध्ये रंगीबेरंगी रांगोळी काढून त्याभोवती पणत्यांची आकर्षक सजावट केली होती. अनेकांनी यानिमित्त धनसंपत्तीची विधीवत पूजा केली.

दागिन्यांच्या खरेदीला प्राधान्य

धनत्रयोदशीच्या शुभमुहूर्तावर सराफी बाजारातल्या दुकानात सोन्या-चांदीच्या दागिन्यांच्या खरेदीसाठी झुंबड उडाली होती. याबाबत सराफ व्यापारी अमित पोखरणा यांनी सांगितले की, 'यंदाच्या वर्षी दागिने खरेदी करण्यासाठी येणाऱ्या ग्राहकांची संख्या वाढली आहे. धनत्रयोदशीच्या दिवशी सोन्याचा भाव २९ हजार ९०० रुपये तर चांदीचा भाव ४० हजार रुपये होता. सोन्यामध्ये प्रामुख्याने गंठण, अंगठी व चेन यांना प्राधान्य दिले गेले. लक्ष्मीची प्रतिमा असणारे शिक्के देखील ग्राहकांकडून खरेदी करण्यात येत होते,'असेही त्यांनी सांगितले. दरम्यान, दुचाकी व इलेक्ट्रॉनिक्स वस्तूंची विक्रीही चांगली झाली असल्याचे व्यापाऱ्यांनी सांगितले.