तहसीलदारांचा बनावट शिक्का, खोट्या सहीचा वापर... शेतकऱ्यांच्या मदतीवर कोतवालाचा डल्ला

अहमदनगर : नैसर्गिक अपत्तीमुळे नुकसान झालेल्या शेतकऱ्यांना भरपाई देण्याची घोषणा सरकारकडून केली जाते. महसूल यंत्रणेमार्फत याचे धनादेश वितरित केले जातात. थेट खात्यात पैसे जमा करण्याची पद्धत येण्याआधी तहसिलदारांमार्फत ही रक्कम शेतकऱ्यांना दिली जात होती. याचाच गैरफायदा उठवत नेवासा तालुक्यातील एका कोतवालेने सुमारे १६ लाख रुपयांची रक्कम परस्पर हडप केल्याचे उघडकीस आले आहे. तहसीलदारांचा बनावट शिक्का व खोट्या सहीचा वापर करून त्यांनी ही रक्कम हडपली.

नेवाशाचे तहसीलदार रुपेशकुमार विजयलाल सुराणा यांनी यासंबंधी फिर्याद दिली आहे. त्यावरून देडगावचा कोतवाल अविनाश हिवाळे याच्याविरूद्ध गुन्हा दाखल केला आहे. या काळात त्याने १६ लाख १४ हजार रुपयांचा अपहार केला आहे.

अतिवृष्टी, दुष्काळ, टंचाई अशा काळात महसूल विभागाकडून पंचमाने करून शेतकऱ्यांना भरपाई दिली जाते. नेवासा तालुक्यातील देडगाव या गावातील लाभार्थी शेतकर्‍यांचे धनादेश देडगावचा कोतवाल अविनाश हिवाळे याच्याकडे दिले होते. त्याने देडगाव गावाचे धनादेश बँकेत जमा करण्यासाठी ताब्यात घेतले. ते धनादेश संबंधित नुकसान ग्रस्त शेतकर्‍यांना वाटप न करता त्या धनादेशामध्ये परस्पर तहसीलदार नेवासा यांचा बनावट शिक्का वापरुन व बनावट सही करुन तसेच बँकेचे नाव बदलुन व रक्कमेमध्ये खाडाखोड केली. रक्कमही बदलली. जी दुरूस्ती केली, त्याला धनादेश देणारे तहसिदार यांची मान्यता आहे, हे भासविण्यासाठी त्यावर शिक्के व खोट्या सह्याही केल्या. त्यामुळे ते बँकेत जमा झाले. नगर अर्बन बँक शाखा कुकाणा, बँक ऑफ बडोदा शाखा भेंडा, बँक ऑफ महाराष्ट्र शाखा नगर या बँकांमध्ये बनावट शिक्का व सही करुन परस्पर खाडाखोड केलेल्या बँकेमध्ये जमा करण्यात आले. लाभार्थी यादीत बदल करून अतुल अविनाश हिवाळे यांचा खातेक्रमांक त्यावर टाकण्यात आला. त्यामुळे ही रक्कम त्या खात्यात जमा झाली.

मंत्री गडाखांनाही फोन आले, पण बधले नाहीत; सहयोगींमधील शिवसेनेसोबत उरले एकटेच

शेतकऱ्यांना भरपाई मिळाली नसल्याच्या तक्रारी येऊ लागल्याने याची चौकशी करण्यात आली. तेव्हा हा प्रकार उघडकीस आला. नेवसा तालुक्यातील देडगावच्या लाभार्थी शेतकर्‍यांचे ९ धनादेश अशा पद्धतीने खाडाखोड करून आढळून आले. पोलिसांनी कोतवाल अविनाश हिवाळे याच्याविरूद्ध गुन्हा दाखल केला आहे.

शिवसेनेतील खदखद खालच्या स्तरापर्यंत, नगरसेवकाचे संपर्कप्रमुखावर गंभीर आरोप