म. टा. प्रतिनिधी, नगर
शैक्षणिक वर्ष २०१८-१९ ची कॉलेजांची विविध अभ्यासक्रमांची प्रक्रिया अंतिम टप्प्यात येत असतानाच पुन्हा एकदा विद्यार्थी संसदच्या निवडणुका खुल्या पद्धतीने होण्याबाबत कॅम्पसच्या आवारात चर्चा सुरू झाली आहे. अखिल भारतीय विद्यार्थी परिषदेने याबाबत विविध कॉलेजांच्या प्राचार्यांना पत्रदेखील दिले आहे; मात्र, अद्याप कॉलेजमधील निवडणूक घेण्याबाबत कोणत्याही सूचना न आल्याचे कॉलेज प्रशासनाकडून सांगण्यात आले. दरम्यान, यंदा खुल्या पद्धतीने विद्यार्थी संसदच्या निवडणुका होण्याची शक्यता गृहीत धरून विद्यार्थी संघटनांनी तयारी सुरू केली आहे.
नवीन विद्यापीठ कायदा लागू झाल्यामुळे पुन्हा एकदा कॉलेजांमध्ये विद्यार्थी संसदच्या निवडणुका खुल्या पद्धतीने होतील, अशी अपेक्षा विद्यार्थी संघटनांना होती. त्यानुसार विद्यार्थी संघटना गेल्या दोन वर्षांपासून तयारी करीत आहेत. मागील वर्षी मात्र कॉलेजांना प्राप्त झालेल्या सूचनांनुसार ऐनवेळी जानेवारी महिन्यात विद्यार्थी संसद गुणवत्तेनुसार निवडण्यात आली होती. परंतु, यंदाच्या शैक्षणिक वर्षात तरी खुल्या पद्धतीने विद्यार्थी निवडणुका होतील, असे गृहीत धरून संघटना कामाला लागल्या आहेत. अभाविपने नुकतेच विविध कॉलेजांच्या प्राचार्यांची भेट घेऊन यासंदर्भात निवेदन दिले आहे.
......
खुल्या पद्धतीने निवडणुका घेण्याबाबत अभाविप संघटनेने निवेदन दिले आहे. मागील शैक्षणिक वर्षात आलेल्या सूचनांप्रमाणे जानेवारी महिन्यात आम्ही गुणवत्तेनुसार विद्यार्थी संसद निवडली होती. यंदाच्या वर्षी अद्याप विद्यार्थी संसद निवडणुकीबाबत कोणत्याही प्रकारच्या सूचना आम्हाला प्राप्त झाल्या नाहीत.
- डॉ. बी. एच. झावरे, प्राचार्य, न्यू आर्ट्स कॉलेज
.....
विद्यार्थी संसद निवडणुकांबाबत अद्याप कोणत्याही सूचना नाहीत. सध्या कॉलेजांची प्रवेश प्रक्रिया अंतिम टप्प्यात आहे. ही प्रक्रिया पूर्ण झाल्यानंतर येत्या दोन ते तीन महिन्यांमध्ये याबाबत सूचना येऊ शकतात.
- बळवंतराव नागवडे, संचालक, नगर उपकेंद्र