आनंदपर्व जल्लोषात

म.टा.प्रतिनिधी,नगर

दारासमोर रेखाटलेली सुंदर रांगोळी...त्याभोवती पणत्याच्या प्रकाशाची छानसी सजलेली आरास...गॅलरीतील आकाश कंदिलासह घरावर व व्यावसायिक कार्यालयांवर नयनरम्य विद्युत रोषणाईचा झगमगाट... असे दिवाळीच्या आनंदपर्वाला प्रारंभ झाला आहे. बुधवारी (१८ ऑक्टोबर) पहाटे फटाक्यांच्या आतषबाजीत अभ्यंगस्नान झाल्यानंतर नगरकरांना वेध लागले आहेत ते गुरुवारच्या (१९ ऑक्टोबर) लक्ष्मीपूजनाचे. त्याच्या तयारीची लगबग घरा-घरांतून सुरू झाली आहे.

सोमवारी वसुबारसेला गोवत्स पूजनापासून दिवाळीला सुरुवात झाली. मंगळवारी धन त्रयोदशीला आरोग्यदेवता धन्वंतरीची आराधना केल्यानंतर व्यावसायिक आस्थापनांनी पारंपरिक चोपडी पूजन उत्साहात केले. धने-गूळ प्रसाद वाटला गेला. आज बुधवारी पहाटे घरोघरी सुवासिक तेल व उटणे लावून उत्साहात अभ्यंगस्नान केले गेले. त्यानंतर चिवडा, लाडू, शेव, करंजी, शंकरपाळी अशा फराळाच्या पदार्थांची मेजवानी रंगली. गुरुवारी सायंकाळी लक्ष्मीपूजनाची धामधूम व त्यानंतर अनेकविध फटाक्यांची आतषबाजी नगरच्या आसमंतात होणार आहे. शुक्रवारी (२० ऑक्टोबर) बलिप्रतिपदा-पाडव्यानिमित्तच्या मिठाई मेजवानीचे व सायंकाळी आप्तस्वकियांना भेटण्याचे बेत सुरू आहेत, तर शनिवारी (२१ ऑक्टोबर) भाऊबीजेनिमित्त बहिण-भावांचे नाते अधिक दृढ करणाऱ्या भेटवस्तूंच्या आदानप्रदानाचे नियोजन सुरू आहे. त्यामुळे भेटवस्तूंच्या दालनांतही गर्दी आहे.

‘सप्तरंगात न्हाऊन आली, आली माझ्या घरी दिवाळी’...असे दिवाळीचे वर्णन प्रसिद्ध असले तरी नगरकरांची यंदाची दिवाळी खरेच अनेकविध आनंदोत्सव घेऊन आली आहे. सरगमप्रेमी मित्रमंडळ व चैतन्य फाउंडेशनच्या दिवाळी पहाट संगीत मैफिलीनंतर अनामप्रेमच्या दिव्यांग कलावंताची संगीत मैफल तसेच बंदिश सांगीतिक प्रतिष्ठानचा नाट्यदीपोत्सव बुधवारी सकाळी उत्साहात झाला. आता शुक्रवारी सकाळी पंडित हृदयनाथ मंगेशकरांच्या गाण्यांची मैफल येथे होणार आहे. त्यामुळे शहराच्या सांस्कृतिक विश्वात संगीत मेजवानीची आनंदोत्सव आहे. यंदा पाऊसही चांगला झाल्याने व मुख्य म्हणजे दिवाळीच्या आधी चार दिवस त्याने उघडीप दिल्याने नगरच्या बाजारपेठेत दिवाळीच्या काळात गर्दी ओसंडून वाहत होती. रात्री उशिरापर्यंत येथे गर्दी होती.