बाळासाहेब थोरात यांची भूमिका
म. टा. प्रतिनिधी, नगर
कोल्हापूरचे पालकमंत्रिपद स्वीकारण्यास महसूलमंत्री तथा काँग्रेसचे पालकमंत्री बाळासाहेब थोरात उत्सुक नाहीत. आपल्याला कोणत्याही जिल्ह्याचे पालकमंत्रिपद नको, त्याऐवजी पक्षातील अन्य मंत्र्याला ते द्यावे, अशी त्यांची भूमिका ते मुख्यमंत्री उद्धव ठाकरे यांना सांगणार आहेत. मात्र, गुरुवारी थोरात दिल्लीत असल्याने त्यांची ठाकरे यांच्याशी भेट झालेली नाही.
बुधवारी रात्री पालकमंत्री नियुक्तीची यादी जाहीर झाली. त्यानंतर थोरातांनी ही भूमिका घेतली आहे. पालकमंत्र्यांची यादी तयार करताना थोरात यांना विश्वासात घेण्यात आलेले नाही, हे यावरून स्पष्ट होते. आपण पूर्वीपासून कोणत्याही जिल्ह्याचे पालकमंत्रिपद नको, अशी भूमिका घेतलेली असून मुख्यमंत्र्यांनाही ती सांगितली होती. तरीही आपली नियुक्ती कशी झाली, याचे आश्चर्य वाटते. आपल्याऐवजी पक्षातील अन्य सहाकाऱ्याला ही संधी मिळावी, असे पत्र मुख्यमंत्र्यांना पाठवत असल्याचे थोरात यांनी म्हटले आहे. नगरचे पालकमंत्री म्हणून नियुक्ती केलेल्या ग्रामविकासमंत्री हसन मुश्रीफ यांना कोल्हापूरचे पालकमंत्रिपद द्यावे आणि आपल्याऐवजी काँग्रेसमधील इतर कोणत्याही मंत्र्याला नगरचे पालकमंत्रिपद द्यावे, अशीही भूमिका थोरातांची असल्याचे सांगण्यात आले.
नगरचे पालकमंत्री म्हणून नियुक्ती न मिळाल्याने थोरात नाराज असल्याचे यावरून दिसून येते. मुश्रीफ यांनी ट्विट करून पद स्वीकारल्याचे संकेत दिले असले, तरी थोरात यांनी मात्र त्यांच्याबद्दल अद्याप उघडपणे काहीही भाष्य केलेले नाही.
...............