रुग्णालय पाडापाडीला डॉक्टरांचा आक्षेप

म. टा. प्रतिनिधी, नगर
खंडपीठाच्या आदेशाने शहरातील रुग्णालयांच्या पार्किंगच्या जागी असलेली बांधकामे पाडण्यास सुरुवात केली असली तरी या कारवाईला शहरातील डॉक्टरांनी आक्षेप घेतला आहे. ‘खंडपीठाच्या आदेशात कोठेही अतिक्रमणे पाडा असे म्हटलेले नसल्याचे सर्वोच्च न्यायालयाच्या विधिज्ञांनी स्पष्ट केले असल्याने या मुद्यावर खंडपीठात दाद मागणार असल्याचे व गरज भासल्यास सर्वोच्च न्यायालयात डॉक्टर जाणार असल्याचे नेत्ररोग तज्ज्ञ डॉ. प्रकाश कांकरिया यांनी ‘मटा’शी बोलताना सांगितले.
खंडपीठाच्या आदेशाने मागील १५ दिवसांपासून रुग्णालयांच्या पार्किंग जागांतील बांधकामे मनपाद्वारे काढून टाकली जात आहेत. १७ ठिकाणची अशी अतिक्रमणे काढली गेली असून, आणखी ३५ रुग्णालयांवर ही कारवाई लवकरच होणार आहे. याशिवाय ३२ रुग्णालयांना स्वतःहून अतिक्रमणे काढण्याच्या नोटिसा दिल्या गेल्या आहेत. या पार्श्वभूमीवर शहरातील डॉक्टरांनी सर्वोच्च न्यायालयातील काही ज्येष्ठ विधिज्ञांचा सल्ला घेतला असून, त्याआधारे खंडपीठात याचिका दाखल करण्याची तयारी सुरू केली आहे.
‘खंडपीठाच्या आदेशात कोठेही पाडा म्हटलेले नाही, फक्त कारवाई करा असे म्हटले असल्याचे सर्वोच्च न्यायालयाच्या वकिलांनी स्पष्ट केले असल्याचे सांगून डॉ. कांकरिया म्हणाले, ‘कारवाई करा म्हणजे वाढीव बांधकामाबाबत दंड करण्यासह परवानगीशिवाय केलेले बांधकाम योग्य नियमानुसार नियमित करणे अपेक्षित असल्याचे या वकिलांचे म्हणणे आहे. त्यामुळे मनपाची सध्याची सुरू असलेली कारवाई चुकीची असल्याचेही त्यांचे मत आहे. त्यामुळे या मुद्यांवर खंडपीठात आम्ही दाद मागणार आहोत.’
‘बाळासाहेब देशपांडे रुग्णालयासही पार्किंग सुविधा नाही व याबाबत अधिकारी ते जुने बांधकाम असल्याचे सांगतात. या निकषानुसार शहरातील अन्य जुन्या खासगी रुग्णालयांनाही कारवाईतून वगळणे आवश्यक होते’, असे सांगून डॉ. कांकरिया म्हणाले, ‘जिल्हाधिकारी, मनपा आयुक्त व सर्वच राजकीय पुढाऱ्यांना आम्ही भेटलो. पण खंडपीठाचा आदेश असल्याने आम्ही मदत करू शकत नाही, असे त्यांच्याकडून सांगितले गेले आहे. सध्याच्या कारवाईमुळे राज्यातही अशाच पद्धतीने कारवाई होऊ शकते व खासगी रुग्णालयांतील हजारो रुग्णांच्या जीवितास धोका होऊ शकतो. त्यामुळे इंडियन मेडिकल असोसिएशनसह आम्ही व्यक्तिगतरित्याही खंडपीठात दाद मागणार आहोत’, असेही त्यांनी स्पष्ट केले.