नगर : संत साहित्याचे गाढे अभ्यासक (स्व.) प्रा. डॉ. र. बा. मंचरकर स्मृती जीवनगौरव पुरस्कार नागपूर येथील प्रसिद्ध साहित्यिक प्रा. डॉ. यशवंत मनोहर यांना जाहीर झाला आहे. आज, रविवारी (१६ फेब्रुवारी) सकाळी १० वाजता येथील राधाबाई काळे महिला महाविद्यालयात या पुरस्काराचे वितरण होणार आहे.
ज्येष्ठ समीक्षक व साहित्यिक विलास राशीनकर व राधाबाई काळे महिला महाविद्यालयाचे प्रभारी प्राचार्य भाऊसाहेब औटी या वेळी उपस्थित राहणार आहेत. प्रतिष्ठानचे अध्यक्ष डॉ. अविनाश सांगोलेकर व सचिव डॉ. अभिजित मंचरकर यांनी या कार्यक्रमाचे आयोजन केले आहे. संत व लोकसाहित्यात आयुष्यभर संशोधन केलेल्या प्रा. डॉ. मंचरकर यांच्या स्मृती निरंतर राहण्यासाठी प्रा. डॉ. र. बा. मंचरकर स्मृती प्रतिष्ठानच्या वतीने मागील सात वर्षांपासून संत साहित्यासह अनेकविध साहित्य निर्मिती करणाऱ्या ज्येष्ठ साहित्यिकाला जीवनगौरव पुरस्कार दिला जातो. यंदाचा असा आठवा 'प्रा. डॉ. र. बा. मंचरकर स्मृती समीक्षा जीवनगौरव पुरस्कार' नामवंत कवी, समीक्षक व साहित्यिक प्रा. डॉ. मनोहर यांना दिला जाणार आहे. अकरा हजार रुपये व स्मृतीचिन्ह असे पुरस्काराचे स्वरूप आहे. या पुरस्काराचे मानकरी डॉ. मनोहर नागपूर विद्यापीठाचे मराठी विभागप्रमुख होते. त्यांचे अकरा कवितासंग्रह, तीन कादंबऱ्या, एक प्रवास वर्णन, बावीस वैचारिक निबंध लेख संग्रह व तेवीस समीक्षाग्रंथ प्रकाशित झाले आहेत.
...............