पाथर्डीत बारमध्ये मद्यधुंद पोलिसाचा धिंगाणा

अहमदनगर :

बीड जिल्ह्यातील एका पोलीस उपनिरीक्षकानं दारूच्या नशेत पाथर्डीतील एका बारमध्ये काल रात्री गोंधळ घातला. त्याला रोखण्यासाठी आलेल्या पोलीस अधिकाऱ्यांनाही त्यानं धक्काबुक्की केली. या प्रकरणी त्याला अटक करण्यात आली आहे.

अमोल मालुसरे असं या अधिकाऱ्याचं नाव आहे. बीड जिल्ह्यातील गेवराई पोलीस ठाण्यात मालुसरे कार्यरत आहे. तो पाथर्डीतील बारमध्ये गेला होता. तेथे जेवणाचे बिल साडेचार हजार रुपये झाले. बारमालकाने बिल मागितल्यानं दोघांमध्ये वाद सुरू झाला. मालुसरे याने रिव्हॉल्व्हर काढून धमकावण्यास सुरुवात केली. मालकासह नोकरांनाही मारहाण केली. याची माहिती मिळाल्यानंतर पाथर्डीचे पोलीस घटनास्थळी गेले. तेथे गेलेल्या अधिकाऱ्यालाही त्याने मारहाण केली. या प्रकरणी बारमालकानं पोलिसांत तक्रार दाखल केली असून, पोलिसांनी मालुसरेला ताब्यात घेतले आहे.