यंदा सुका मेवा महागला

म. टा. प्रतिनिधी, नगर

रमजान ईदच्या दिवशी केल्या जाणाऱ्या शिरखुर्म्यासाठी लागणारा सुका मेवा या वर्षी महागला आहे. यासाठी लागणाऱ्या बहुतांश वस्तूंचे भाव १० ते १५ टक्के वाढले. काजूचे भाव ५५० रुपयांवरून ७०० रुपयांवर गेले आहेत. शेवायाही १०० रुपयांवरून १५० रुपये किलो झाल्या आहेत.

महिनाभराचे उपवास संपल्यानंतर रमजान ईदच्या दिवशी गोडधोड पदार्थ केले जातात. उपवासामुळे झालेली झीज भरून काढण्यासाठी पौष्टिक पदार्थ बनविले जातात. त्यातच शिरखुर्म्याला महत्त्व आहे. दूध, शेवया आणि सुका मेव्यापासून तयार करण्यात येणाऱ्या शिरखुर्म्यासाठी नातेवाई आणि मित्रमंडळींनाही निमंत्रण दिले जाते. या वर्षी मात्र त्यासाठी लागणारे सर्वच पदार्थ महागले आहेत. बदाम, काजू, पिस्ता, खोबरे, शेवाया, टरबूज बी, चारोळी, खारिक यांच्या भावात १० टक्क्यांपर्यंत वाढ झाली आहे. शहरातील दुकानांमध्ये सुकामेव्याची विक्री सुरू असून हातगाडीवरून फिरून शेवया आणि अन्य पदार्थ विक्री करणारे फेरीवालेही शहरात दिसत आहेत. हैदराबाद, दिल्ली, मुंबई आदी शहरांतून येथे सुका मेवा मागवला जातो. ईद जवळ आल्याने या पदार्थांची खरेदी जोरात सुरू आहे.

सुक्यामेव्याचे दर
किसमिस ः १०० ते ३०० रुपये
खजूर ः ६० ते ४३०० रुपये
काजू ः ७०० ते ९०० रुपये किलो
बदाम ः ६०० ते ७०९ रुपये
खोबरे ः ७५ ते ११० रुपये
पिस्ता ः १५०० रुपये
शेवया ः १०० ते १५० रुपये