'पतंजली'मुळे दूध
व्यवसाय अडचणीत
राजेश परजणे यांचे मत
म.टा. प्रतिनिधी, नगर
'योगगुरू रामदेव बाबा यांचा 'पतंजली'च्या माध्यमातून दूध व्यवसायात उतरण्याचा निर्णय शेतकऱ्यांसाठी घातक ठरणारा असून, राज्यातील सहकारी दूध संघ देशोधडीला लागतील. त्यामुळे रामदेवबाबा यांनी योगाचेच धडे द्यावेत,' असे मत गोदावरी खोरे नामदेवराव परजणे तालुका सहकारी दूध संघाचे अध्यक्ष राजेश परजणे यांनी व्यक्त केले.
कोपरगाव तालुक्यातील गोदावरी दूध संघाच्या ४३ व्या वार्षिक सर्वसाधारण सभेत ते बोलत होते. ते म्हणाले, 'सरकार सध्या खासगी दूध संघांना पायघड्या घालत आहे. त्यातून राज्यातील सहकारी संघ उद्ध्वस्त होत आहेत. रामदेव बाबा दुसऱ्याकडून दूध, तूप बनवून त्यावर केवळ पतंजलीचे नाव टाकून ग्राहकांची फसवणूक करीत आहेत. त्यांच्या मालाच्या गुणवत्तेची तपासणी व्हावी. यापुढे सहकारी दूध संस्थांपुढे मोठे आव्हान असून, त्याला धैर्याने तोंड द्यावे लागेल. अन्न व औषध प्रशासनाची जबाबदारी महानंद या संस्थेकडे सोपवावी, अशा मागण्या करण्यात आल्या आहेत, मात्र सरकार त्याकडे लक्ष देत नाही.'
कार्यकारी संचालक सी. एस. गाढवे यांनी इतिवृत्त वाचन केले. विषय पत्रिकेवरील सर्व विषय एकमताने मंजूर करणायत आले. उपाध्यक्ष एस. बी. खांडेकर यांनी आभार मानले.
..........