मुख्य आरोपीसह तिघांना अटक

म.टा.प्रतिनिधी,नगर

पांगरमल येथे निवडणुकीच्या प्रचारादरम्यान पार्टीत बनावट दारू देणारा मुख्य आरोपी मोहन श्रीराम दुग्गल (रा. तारकपूर) याला नांदेड येथील गुरूद्वाराजवळून पोलिसांनी अटक केली. त्याच्यासोबत असणारे संदीप मोहन दुग्गल (रा.तारकपूर) व वैभव जयसिंग जाधव (वय ३०, रा.पाइपलाइन रोड)यांनाही पोलिसांनी ताब्यात घेतले आहे.

पांगरमल दारूकांडामध्ये भीमराव आव्हाड याच्यासह आतापर्यंत जाकीर शेख, जितू गंभीर, हमीद शेख या चौघांना पोलिसांनी अटक केलेली आहे. या घटनेतील फरार असणारा मुख्य आरोपी मोहन दुग्गल याला सुद्धा पोलिसांना शनिवारी नांदेड येथे पकडण्यात यश आले. आरोपी मोहन दुग्गल हा मुंबई व अमरनाथ येथे असल्याची माहिती पोलिसांना मिळाली होती. त्यानुसार पोलिसांचे एक पथक आरोपीला अटक करण्यासाठी अमरनाथ येथे रवाना झाले होते. परंतु येथून दुग्गल हा नांदेड येथे गेला असल्याची माहिती पोलिसांना मिळाली. सहायक पोलिस निरीक्षक विनोद दिघोरे यांच्या मार्गदर्शनाखाली एका पथकाने नांदेड शहरात ठिकठिकाणी आरोपींबाबत चौकशी केली असता सदर आरोपी हे सचखंड गुरुद्वारा गेट नंबर दोन जवळ असणाऱ्या डिंपलसिंग नवाब लॉज येथे असल्याची माहिती मिळाली. त्यानंतर पोलिसांनी छापा टाकत मोहन दुग्गल, संदीप दुग्गल व वैभव जाधव या तिघांना ताब्यात घेऊन नगरच्या

एमआयडीसी पोलिस स्टेशनचे सहायक पोलिस निरीक्षक राहुल पाटील यांच्या स्वाधीन केले.

दरम्यान,पांगरमल दारूकांडानंतर टीकेची झोड उठलेल्या पोलिसांनी व राज्य उत्पादन शुल्क विभागाने शहरासह जिल्ह्याच्या विविध भागांमध्ये छापे टाकत अवैध दारूविक्री रोखण्यास सुरुवात केली आहे. उत्पादन शुल्क विभागाने गेल्या दोन दिवसांमध्ये अंदाजे सात लाखांचा मुद्देमाल जप्त केला आहे. पांगरमल येथील ग्रामस्थांनी पोलिस अधीक्षकांची भेट घेऊन पांगरमल दारूकांडाला जबाबदार असणाऱ्या सर्व आरोपींना अटक करण्यासोबतच हा खटला चालवण्यासाठी अॅड.उज्ज्वल निकम यांची नियुक्ती करण्याची मागणी केली आहे. याशिवाय राज्याचे विरोधीपक्ष नेते राधाकृष्ण विखे पाटील हे रविवारी दुपारी तीन वाजता पांगरमल येथे भेट देणार आहेत.