म. टा. प्रतिनिधी, नगर
तंबाखू खाऊन न्यायालयासमोर जाणे एका पोलिस कर्मचाऱ्याच्या चांगलेच अंगलट आले. हा पोलिस कर्मचारी तंबाखू चघळतच न्यायालयात दाखल झाला. ही बाब न्यायाधीशांच्या निदर्शनास आल्यामुळे त्यांनी तंबाखू खाऊन थुंकलेल्या भिंती साफ करण्याची शिक्षा सुनावली.
पोलिस मुख्यालयात नेमणुकीला असलेले हेडकॉन्स्टेबल बबन साळवे व इतर पोलिस कर्मचारी हे जिल्हा व सत्र न्यायाधीश ए. आर. नावंदर यांच्या न्यायालयात आरोपी घेऊन आले होते. त्यावेळी पोलिस कर्मचारी साळवे हे तोंडात काहीतरी चघळत असल्याचे न्यायाधीशांच्या लक्षात आले. न्यायाधीशांनी साळवे यांना तोंडात काय आहे, अशी विचारणा केली. पोलिस कर्मचारी साळवे यांनी तोंडात सुपारी आहे, असे सांगितले. परंतु न्यायाधीशांनी इतर कर्मचाऱ्यांना तोंडात काय आहे हे तपासण्यास सांगितल्यानंतर या कर्मचाऱ्याच्या तोंडात तंबाखू असल्याचे उघडकीस आले. त्यानंतर कर्मचारी हा तोंड स्वच्छ धुवून न्यायालयासमोर आल्यानंतर न्यायाधीशांनी तंबाखू खाणाऱ्या पोलिस कर्मचाऱ्याला न्यायालयात तंबाखू खाऊन थुंकलेल्या भिंती साफ करण्यास तोंडी सांगितले. या कर्मचाऱ्यानेही ओल्या फडक्याने न्यायालयाच्या भिंतीवरील थुंकून लाल झालेले काही कोपरे साफ केले. न्यायालयात तंबाखू खाण्यास बंदी असल्याने ही बाब न्यायालयाने गांभीर्याने घेतली असून तंबाखू खाणाऱ्या पोलिस कर्मचाऱ्यावर कारवाई करावी, असा अहवाल न्यायाधीशांनी पोलिस अधीक्षकांना पाठविला आहे. न्यायालयात प्रवेश करताना पोलिस कर्मचारी हे पक्षकार व वकिल यांना तपासून आत सोडतात. तंबाखू, गुटखा पुड्या आढळल्या त्या जप्त करतात. त्यानंतर अनेक जण तंबाखू घेऊन न्यायालयात येऊन तंबाखू खाऊन भिंतीवर थुंकतात.