अहमदनगरमध्ये निवडणूक कर्मचाऱ्याचा मृत्यू

अहमदनगर:

अहमदनगर येथील सावेडी निवडणूक कार्यालयात एका निवडणूक कर्मचाऱ्याचा मृत्यू झाल्याची दुर्देवी घटना घडली आहे. आजारी असल्यामुळे या कर्मचाऱ्याचा मृत्यू झाल्याचं सांगण्यात येतं.

अशोक पांडुरंग सूर्यवंशी असं या कर्मचाऱ्याचं नाव आहे. सूर्यवंशी गेल्या काही दिवसांपासून आजारी होते. अहमदनगरमध्ये आज महापालिका निवडणुकीसाठी मतदान होत आहे. त्यापार्श्वभूमीवर सूर्यवंशी सकाळीच ड्यूटीवर आले होते. मात्र प्रकृती ठीक नसल्याने ते सकाळी सावेडी परिसरातील मतदान कार्यालयाच्या पायऱ्यांवर झोपले होते. सूर्यवंशी बराच वेळ पायऱ्यांवर पडून असल्याचं लक्षात आल्यानंतर काही कर्मचाऱ्यांनी त्यांना उठवण्याचा प्रयत्न केला. परंतु, सूर्यवंशी यांनी कोणताही प्रतिसाद न दिल्याने तात्काळ डॉक्टरांना पाचारण करण्यात आले. डॉक्टरांनी त्यांना तपासून त्यांचा मृत्यू झाल्याचं सांगितलं. दरम्यान, या प्रकरणी तोफखाना पोलीस ठाण्यात अकस्मात मृत्यूची नोंद करण्यात आली आहे.