नगर : नगर महानगरपालिका निवडणुकीच्या ड्युटीवर असलेल्या कर्मचाऱ्याचा मृत्यू झाला. अशोक पांडुरंग सूर्यवंशी (वय ५४) असे या कर्मचाऱ्याचे नाव आहे. ते महानगरपालिकेतील सार्वजनिक बांधकाम विभागात चतुर्थश्रेणी कर्मचारी म्हणून नोकरीला होते. महानगरपालिकेसाठी रविवारी मतदान झाले. सावेडी प्रभाग कार्यालयातून निवडणूक साहित्य देणे व परत घेण्याचे काम सूर्यवंशी यांच्याकडे होते. शनिवारी मतदानाचे साहित्यवाटप केल्यानंतर दुसऱ्या दिवशी रविवारी सकाळी ते सावेडी कार्यालयात ड्युटीवर आले होते. अस्वस्थ वाटू लागल्याने ते कार्यालयाच्या पायऱ्यांवर झोपले होते. बराच वेळ झोपल्यानंतर दहाच्या सुमारास काही कर्मचाऱ्यांनी त्यांना उठविण्याचा प्रयत्न केला. परंतु, सूर्यवंशी यांनी कोणताही प्रतिसाद न दिल्याने तत्काळ डॉक्टरांना बोलावण्यात आले. डॉक्टरांनी त्यांना तपासून त्यांचा मृत्यू झाल्याचे सांगितले. सिव्हिल हॉस्पिटलमध्ये श्वविच्छेदन करून मृतदेह नातेवाईकांच्या ताब्यात देण्यात आला आहे. याप्रकरणी तोफखाना पोलिस ठाण्यात अकस्मात मृत्यूची नोंद करण्यात आली आहे.
नगरमध्ये निवडणूक कर्मचाऱ्याचा मृत्यू
नगर महानगरपालिका निवडणुकीच्या ड्युटीवर असलेल्या कर्मचाऱ्याचा मृत्यू झाला अशोक पांडुरंग सूर्यवंशी (वय ५४) असे या कर्मचाऱ्याचे नाव आहे...
Maharashtra Times 10 Dec 2018, 4:00 am