पालिका निवडणुकीच्या घडामोडींना वेग

म. टा. प्रतिनिधी, नगर

दिवाळीनंतर महापालिका निवडणुकीच्या घडामोडींना वेग आला आहे. शिवसेनेने ३२ उमेदवारांची यादी जाहीर करीत आघाडी घेतली आहे. आता भाजप, राष्ट्रवादी काँग्रेस सोमवारी इच्छुक उमेदवारांच्या मुलाखती घेणार आहेत.

नगर महापालिकेसाठी ९ डिसेंबर रोजी निवडणूक होणार आहे. एक नोव्हेंबर रोजीच निवडणुकीची घोषणा झाल्यानंतर प्रशासकीय स्तरावर जोरदार तयारी सुरू झाली आहे. इच्छुक उमेदवारांना मात्र अंतिम मतदारयादीची प्रतीक्षा होती. सहा नोव्हेंबर रोजी अंतिम मतदारयादी प्रसिद्ध झाली, परंतु, त्यानंतर लगेच दिवाळी सुरू झाल्यामुळे निवडणुकीच्या घडामोडी मंदावल्या होत्या. दिवाळीनंतर पुन्हा एकदा घडामोडींना वेग आला असून शिवसेनेने यामध्ये आघाडी घेतली आहे. शिवसेनेने आपल्या ३२ उमेदवारांची यादी जाहीर केली असून प्रभाग क्रमांक ७, ८, १२, १३ आणि १५ मध्ये चारही जागांवर उमेदवार जाहीर केले आहेत.

भारतीय जनता पक्ष व राष्ट्रवादी काँग्रेस यांनीही इच्छुक उमेदवारांच्या मुलाखतींचा कार्यक्रम जाहीर केला आहे. त्यानुसार भाजपच्या मुलाखती टिळक रोडवरील लक्ष्मीनारायण मंगल कार्यालयात सोमवारी सकाळी दहापासून भाजपच्या कोअर कमिटीचे पाच सदस्य घेणार आहेत. तर, राष्ट्रवादी काँग्रेसच्या मुलाखती सोमवारी सकाळी अकरापासून राष्ट्रवादी भवन येथे होणार आहेत.