अकराशे शाळांना मिळणार फुटबॉल

म. टा. प्रतिनिधी, नगर
फेडरेशन ऑफ इंटरनॅशनल फुटबॉल असोसिएशन (FIFA) मार्फेत घेण्यात येणाऱ्या फुटबॉल वर्ल्ड कप स्पर्धेच्या पार्श्वभूमीवर शाळकरी विद्यार्थ्यांमध्ये फुटबॉल खेळाची आवड निर्माण व्हावी, या उद्देशाने जिल्ह्यातील जवळपास अकराशे शाळांना प्रत्येकी तीन फुटबॉल देण्यात येणार आहेत.

आपल्या देशात फिफामार्फेत १७ वर्षाखालील खेळाडूंसाठी फुटबॉल वर्ल्ड कप स्पर्धा ऑक्टोबर महिन्यात आयोजित करण्यात आली आहे. नवी मुंबई येथील डी. वाय. पाटील स्टेडियम येथे स्पर्धेतील काही सामने होणार आहेत. या सामन्यांच्या पार्श्वभू्मीवर राज्यात फुटबॉल खेळाची आवड निर्माण व्हावी, अधिकाधिक मुलांनी फुटबॉल खेळण्यासाठी प्रवृत्त व्हावे, यासाठी महाराष्ट्र फुटबॉल मिशन हा कार्यक्रम राज्य सरकारच्या वतीने राबवण्यात येत आहे. त्यासाठी जिल्हास्तरावर समिती गठीत करण्यात आली असून त्याचे शिक्षणाधिकारी अध्यक्ष तर जिल्हा क्रीडा अधिकारी सदस्य सचिव आहेत. या समितीच्या अंतर्गत फुटबॉल खेळाचा प्रचार व प्रसार करण्यासाठी विविध उपक्रम राबवण्यात येणार असून त्याअंतर्गत शाळांना प्रत्येकी तीन फुटबॉल देण्यात येणार आहेत. यासाठी जिल्ह्यातील जवळपास १ हजार ११६ शाळांची निवड करण्यात आली असून यासर्वांना लवकरच फुटबॉलचे वाटप करण्यात येणार आहे.