म. टा. प्रतिनिधी, नगर
'अकरावीला प्रवेश देताना ज्या कॉलेजांमध्ये अनुदानित व विनाअनुदानित तुकड्या आहेत, त्या सर्व कॉलेजांनी सर्वात प्रथम अनुदानित तुकड्यांचे प्रवेश पूर्ण करून घ्यावेत. कोणत्याही परिस्थितीत अनुदानित जागा शिल्लक असताना विनाअनुदानित जांगावर प्रवेश देऊ नये,' असा आदेशच माध्यमिक शिक्षण विभागाचे शिक्षणाधिकारी लक्ष्मण पोले यांनी दिला आहे. 'अकरावी प्रवेशाचे ठरवून दिलेले वेळापत्रक हे सर्व ज्युनिअर कॉलेजांना पाळणे बंधनकारक असून, त्यानुसारच प्रवेश प्रक्रिया राबवावी. नियमबाह्य प्रवेश देणाऱ्या कॉलेजांवर कारवाई करण्यात येईल,' असा इशाराही त्यांनी दिला.
अकरावी प्रवेशाचे अंतिम नियोजन करण्यासाठी जिल्ह्यातील प्राचार्यांची बैठक बुधवारी न्यू आर्टस्, कॉमर्स अँड सायन्स महाविद्यालयाच्या सभागृहात झाली. या वेळी पोले बोलत होते. याप्रसंगी उपशिक्षणाधिकारी रामदास खेडकर, विस्तार अधिकारी राजेंद्र पवार, सुनील वाळके, प्रा. भास्करराव जऱ्हाड, डॉ. नवनाथ टकले, प्राचार्य सुनील पंडित, उपप्राचार्य प्रा. एम. एल. म्हस्के, प्रा. अशोक दोडके, प्रा. उद्धव उगले, प्रा. विकास वाळुंजकर यांच्यासह जिल्ह्यातील विविध ज्युनिअर कॉलेजांचे प्राचार्य, प्रतिनिधी उपस्थित होते.
'अकरावी प्रवेशासाठी तयार करण्यात आलेली नियमावली प्रत्येक कॉलजेने पाळावी. कोणत्याही ज्युनिअर कॉलेजने क्षमतेपेक्षा जास्त प्रवेश देऊ नयेत. क्षमतेपेक्षा जास्त प्रवेश द्यायचे असल्यास शिक्षण विभागाची परवानगी घ्यावी लागेल. मात्र, आपल्या आजूबाजूच्या दहा किलोमीटर परिसरातील इतर ज्युनिअर कॉलेजमधील प्रवेश पूर्ण झाल्यानंतरच क्षमतेपेक्षा जास्त प्रवेश देण्यास परवानगी देण्याचा निर्णय घेतला जाईल,' असेही पोले यांनी स्पष्ट केले. 'अकरावी प्रवेश प्रक्रिया राबवताना गुणवत्तेनुसार प्रवेश यादी तयार करून व राखीव जागांचे काटेकोरपणे पालन करूनच प्रवेश देण्यात यावेत. विनाअनुदानित तत्त्वावरील उच्च माध्यमिक विद्यालये व कनिष्ठ महाविद्यालयांनी सरकार निर्णयाप्रमाणे शुल्क निश्चित करून आकारणी करावी. हे शुल्क आकारताना सरकारने वेळोवेळी निर्गमित केलेल्या सूचनानुसार मान्यता घ्यावी,' असेही बैठकीत स्पष्ट करण्यात आले.
.......
प्रवेशअर्ज मोफत द्या
'२७ मे २००३ च्या शासन निर्णयानुसार प्रवेश अर्ज व माहिती पुस्तिका याचे कुठलेही शुल्क न घेता ते मोफत उपलब्ध करून देण्यात यावेत,' अशा सूचना बैठकीत देण्यात आल्या आहेत. प्रवेशाच्या तयार करण्यात आलेल्या नियमावलीतही हे स्पष्ट करण्यात आले आहे. याशिवाय ११ जुलैपर्यंत सर्वच ज्युनिअर कॉलेजांनी आपली प्रवेश प्रक्रिया पूर्ण करून घ्यावी. ११ जुलैनंतर कोणत्याही कॉलेजला परस्पर विद्यार्थ्यांना अकरावीला प्रवेश देता येणार नाही. ११ जुलैनंतर शिल्लक राहिलेल्या जागांवर प्रवेश द्यायचे असल्यास त्यासाठी कॉलेजांनी शिक्षण विभागाची परवानगी घ्यावी, असेही स्पष्ट करण्यात आले आहे.
.......
कॉलेजांनी नियमाप्रमाणे शुल्क घ्यावे
'अकरावीला प्रवेश देताना ज्युनिअर कॉलेजांनी नियमाप्रमाणे शुल्क आकारावे. कोणत्याही कॉलेजबाबत शिक्षण विभागाकडे तक्रार येणार नाही, याची दक्षता घ्यावी. अनुदानित कॉलेजांमध्ये साधारणपणे अकरावीसाठी ३९५ रुपये, तर बारावीसाठी ४१० रुपये शुल्क आकारण्यात यावे,' असेही बैठकीत स्पष्ट करण्यात आले.
.......
'ट्युशन तिकडे, विद्यार्थी इकडे' प्रकार बंद करा
'अकरावीला प्रवेश घेणारे विद्यार्थी कॉलेजांमध्ये नियमित येणारे असावेत. ट्युशन दुसऱ्या शहरामध्ये आणि प्रवेश आपल्याकडे, असे प्रकार चालणार नाहीत. अशा पद्धतीचे बोगस प्रवेश आढळल्यास संबंधित ज्युनिअर कॉलेजांवर कडक कारवाई करण्यात येईल,' असा इशाराही शिक्षणाधिकाऱ्यांनी बैठकीत दिला.
.........
शिक्षणविभागाच्या महत्त्वाच्या सूचना
-अकरावीचा प्रवेश अर्ज व माहितीपुस्तकाचे शुल्क घेऊ नये
-२३ जून ते ६ जुलैपर्यंत अनुदानित जागांवरील प्रवेश पूर्ण करा
-७ ते ११ जुलै दरम्यान विनाअनुदानित तुकड्यांचे प्रवेश करा
- गुणवत्ता व आरक्षणाच्या अधीन राहून प्रवेश द्यावेत
-२० टक्के जागा ज्युनिअर कॉलेजला संलग्न असलेल्या शाळेला राखीव ठेवाव्यात
-नियमबाह्य प्रवेश करू नका, जेणेकरून कोणत्याही प्रवेशाबाबत हरकती अथवा तक्रार येणार नाही
..................
अकरावी प्रवेशाचे अंतिम वेळापत्रक
- प्रवेश अर्ज वाटप व स्वीकृती : १३ ते १७ जून
- प्राप्त सर्व अर्जांचे कम्प्युटरायझेशन : १८ जून
- सर्व विद्यार्थ्यांची प्राथमिक गुणवत्ता यादी प्रसिद्ध करणे : १९ जून
- प्राथमिक गुणवत्ता यादीवर आक्षेप मागविणे : २० व २१ जून
- सर्व विद्यार्थ्यांची अंतिम गुणवत्ता यादी प्रसिद्ध करणे : २२ जून
- गुणवत्ता यादीप्रमाणे प्रवेश देणे : २३ ते २५ जून
- प्रतीक्षा यादी क्रमांक १ जाहीर करणे : २६ जून
- प्रतीक्षा यादी क्रमांक १ प्रमाणे प्रवेश : २७ व २८ जून
- प्रतीक्षा यादी क्रमांक २ जाहीर करणे : २९ जून
- प्रतीक्षा यादी क्रमांक २ प्रमाणे प्रवेश : ३० जून ते २ जुलै
- प्रतीक्षा यादी क्रमांक ३ जाहीर करणे : ३ जुलै
- प्रतीक्षा यादी क्रमांक ३ प्रमाणे प्रवेश : ५ व ६ जुलै
- विनाअनुदानित तुकड्यांची यादी जाहीर करणे व प्रवेश देणे : ७ ते ११ जुलै
- अकरावीचे वर्ग सुरू : १२ जुलै
....................