‘देशात तरुणांना रोजगार देणारा कायदा हवा’

नगर : 'जगात भारत हा तरुणांची संख्या जास्त असणारा देश आहे. येथे सुधारित नागरिकत्व कायद्याची गरज नसून रोजगार सुधारणा व रोजगार देणारा कायद्याची आवश्यकता आहे,' असे मत युनूस तांबटकर यांनी ऑल इंडिया यूथ फेडरेशनच्या जिल्हा अधिवेशनात मांडले.

किसान भवन (बुरुडगाव रोड) येथे यूथ फेडरेशनचे अधिवेशन उत्साहात झाले. या अधिवेशनामध्ये तांबटकर यांनी आपले विचार मांडले. तर, अधिवेशनाचे उद्घाटक डॉ. बापू चंदनशिवे यांनी आपल्या मनोगतामध्ये युवक विद्यार्थ्यांच्या प्रश्नावर लक्ष केंद्रीत केले. 'लहान-मोठ्या चळवळी करून आपल्या प्रश्नांना वाचा फोडली पाहिजे. समाज माध्यमाचा अभ्यास करून योग्य पद्धतीने त्याचा वापर केला पाहिजे,' असा सल्लाही चंदनशिवे यांनी दिला. यूथ फेडरेशनची भूमिका नेमकी काय आहे, याबाबत अॅड. सुभाष लांडे यांनी सांगितले.

अधिवेशनात 'सुधारित नागरिकत्व कायदा', 'एनआरसी', 'एनपीआर'यांच्या विरोधात 'हम कागज नही दिखायेंगे' असा ठराव करण्यात आला. आगामी काळात शिक्षण व रोजगार हक्क आंदोलन सुरू करणे, सावित्रीबाई फुले पुणे विद्यापीठाचे नगर उपकेंद्र ताबडतोब कार्यान्वित करावे, या मागणीसाठी आंदोलन करण्याचा ठरावसुद्धा या वेळी घेण्यात आला.