इंजिनीअरिंगचे प्रवेश पुढील महिन्यात

म. टा. प्रतिनिधी, नगर
इंजिनीअरिंग अभ्यासक्रमाच्या शैक्षणिक वर्ष २०१७-१८ च्या प्रथम वर्षाला प्रवेश घेण्याची इच्छा असणाऱ्या विद्यार्थ्यांची ऑनलाइन नोंदणी ५ जूनपासून सुरू होणार आहे. तंत्रशिक्षण संचालनालयाच्या http://www.dtemaharashtra.gov.in या वेबसाइटवर याबाबत माहिती देण्यात आली आहे.
त्यानुसार विद्यार्थ्यांना ऑनलाइन नोंदणी व कागदपत्रांची पडताळणी करण्यासाठी १७ जूनपर्यंत मुदत देण्यात आली आहे. इंजिनीअरिंग आणि फार्मसी अभ्यासक्रमाच्या आगामी शैक्षणिक वर्षाच्या (२०१७-१८) प्रथम वर्षाच्या प्रवेशासाठी ११ मे रोजी ‘एमएचटी-सीईटी’ परीक्षा घेण्यात आली होती. या परीक्षेसाठी जिल्ह्यातील २२ हजार ६ विद्यार्थ्यांनी नोंदणी केली होती. त्यापैकी २१ हजार ४९७ विद्यार्थ्यांनी प्रत्यक्ष परीक्षा दिली. आता जूनच्या दुसऱ्या आठवड्यात इंजिनीअरिंगला प्रवेश घेण्याची इच्छा असणाऱ्या विद्यार्थ्यांची ऑनलाइन नोंदणी सुरू होण्याची शक्यता आहे. तंत्रशिक्षण संचालनालयाच्या वेबसाइटवर प्रसिद्ध झालेल्या नोटीफिकेशनप्रमाणे विद्यार्थ्यांना ऑनलाइन नोंदणी व कागदपत्रांची पडताळणी करण्यासाठी ५ जून ते १७ जूनपर्यंत मुदत दिली आहे. तर, विद्यार्थ्यांची प्राथमिक गुणवत्ता यादी १९ जून रोजी प्रसिद्ध करण्यात येणार आहे. या यादीवर हरकती नोंदवण्यासाठी विद्यार्थ्यांना २० जून व २१ जून हे दोन दिवस मुदत असणार असून विद्यार्थ्यांची अंतिम गुणवतता यादी २२ जून रोजी प्रसिद्ध होण्याची शक्यता आहे.