कुक्कुट विकास गटांची चार तालुक्यांत स्थापना

म. टा. प्रतिनिधी, नगर

जिल्ह्यात सार्वजनिक खासगी भागीदारी तत्वावर सधन कुक्कुट विकास गटाची स्थापना करण्यात येणार आहे. या योजनेत पहिल्या टप्प्यात संगमनेर, अकोले, कर्जत व जामखेड या चार तालुक्यांची निवड करण्यात आली आहे. या चार तालुक्यांतून प्रत्येकी एक या प्रमाणे चार लाभार्थी निवडले जाणार आहेत. लाभार्थींच्या निवडी झाल्यानंतर त्यांना पन्नास टक्के अनुदान दिले जाणार आहे. २८ फेब्रुवारीपर्यंत लाभार्थींनी प्रस्ताव सादर करण्याचे आवाहन विभागाने केले आहे.

जिल्ह्यात तीन टप्प्यात ही योजना राबवली जाणार आहे. पहिल्या टप्प्यात चार तालुक्यांची निवड झाली आहे. या तालुक्यातील लाभार्थी निवडीची प्रक्रिया सुरू झाली आहे. या योजनेत मात्र प्रत्येक तालुक्यातून एकच लाभार्थी निवडावा लागणार आहे. त्यामुळेही अधिकाऱ्यांच्या अडचणी वाढणार आहेत. इच्छुकांची संख्या वाढल्यास त्यातून एकाच लाभार्थीची निवड करताना अधिकाऱ्यांचा कस लागणार आहे. लाभार्थींच्या निवडी झाल्यानंतर त्यांना पक्षीगृह बांधकामासाठी अनुदान दिले जाणार आहे. योजनेचा संपूर्ण खर्च १० लाख २७ हजार इतका असून यातील पन्नास टक्के म्हणजेच ५ लाख १३ हजार रुपये अनुदान राज्य सरकारकडून दिले जाणार आहेत.