‘प्रज्ञा शोध’मध्ये २५ हजार विद्यार्थी

म. टा. प्रतिनिधी, नगर

आंतरराष्ट्रीय कृष्णभवनामृत संघाने (इस्कॉन) ‘गीता सर्वांसाठी’ या उद्देशाने आयोजित केलेल्या भगवद् गीता प्रज्ञा शोध परीक्षेत जिल्ह्यातील पाचवी ते दहावीतील तब्बल २५ हजार विद्यार्थ्यांनी सहभाग घेतला. नगरच्या भाऊसाहेब फिरोदिया शाळेच्या मैदानावर या परीक्षेचे उद्घाटन ज्येष्ठ शिक्षणतज्ज्ञ डॉ. शरद कोलते यांच्या हस्ते झाले.

भगवद् गीतेच्या अभ्यासाने मुलांमध्ये नीतिमूल्यांचा विकास, तणाव व्यवस्थापन, मानसिक एकाग्रता, उच्च विचार व सेवाभाव निर्माण होत असल्याने इस्कॉनच्या नगर सेंटरच्या पुढाकाराने दरवर्षी ‘गीता सर्वांसाठी’ उपक्रमांतर्गत प्रज्ञा शोध परीक्षा घेतली जाते. मागील वर्षी या परीक्षेस २१ हजार विद्यार्थी बसले होते. यंदा २५ हजार विद्यार्थ्यांनी ही परीक्षा दिली. जुलै महिन्यापासून हा उपक्रम जिल्हाभरात राबविला जात आहे. या परीक्षेतील विजेत्या विद्यार्थ्यांना भगवदगीता, सराव प्रश्नसंच, प्रमाणपत्र, प्रसाद ट्रॉफी व रोख बक्षिसे मिळणार आहेत.

फिरोदिया शाळेच्या मैदानावर झालेल्या या परीक्षेस शहरातील दोन हजार दोनशे विद्यार्थी बसले होते. डॉ. कोलते यांच्यासह प्राप्तिकर सहाय्यक आयुक्त सुरेंद्रकुमार अलग, हृदयरोगतज्ज्ञ डॉ. आर. आर. धूत, नगर इस्कॉनचे अध्यक्ष लक्ष्मीनारायण दास, डॉ. राहुल धूत आदी उपस्थित होते.