म. टा. प्रतिनिधी, नगर
नगर लोकसभा मतदारसंघात भाजपचे उमेदवार सुजय विखे यांनी ५१ लाख ८९ हजार रुपये इतका, तर राष्ट्रवादी काँग्रेसचे उमेदवार संग्राम जगताप यांनी ४२ लाख ४० हजार रुपये खर्च केला आहे. इतर पक्षाचे व अपक्षांचा खर्च लाखांच्या आताच झाला आहे. निवडणूक आयोगाने १८ एप्रिलपर्यंत तपासलेला हा खर्च आहे. इतर दिवसांचा खर्च आयोगाला तपासायचे आहे. पूर्ण निवडणुकीत झालेल्या अंतिम खर्च उमेदवारांना महिनाभरात सादर करायचा आहे.
नगर मतदारसंघातील १९ उमेदवारांचे भवितव्य २३ एप्रिलला मतदान यंत्रात बंद झाले आहे. आता उमेदवाराला संपूर्ण निवडणुकीत झालेल्या अंतिम खर्च हा मतमोजणी झाल्यानंतर तीस दिवसांत सादर करायचा आहे. लोकसभा निवडणुकीची मतमोजणी २३ मेला होणार आहे. त्यानंतर महिनाभरात निवडणूक खर्च सादर करायचा आहे. निवडणुकीसाठी उमेदवारांना ७० लाख रुपयांच्या खर्चाची मर्यादा आहे. उमेदवारी अर्ज दाखल झाल्यापासून उमेदवारांचा खर्च हिशेबात धरण्यात येत आहे. रॅली, स्टार प्रचारकांचा सभा यांचा खर्च उमेदवार दाखवत आहे. उमेदवार करत असलेल्या खर्चांवर आयोगाचे पथक लक्ष ठेवून आहे. कमी खर्च सादर करणाऱ्या उमेदवाराला नोटिसा देण्यात आलेल्या आहेत. उमेदवारांना सादर केलेल्या खर्च व आयोगाच्या पथकाने काढलेला खर्चात तफावत आढळून येत आहे. आयोगाने काढलेला खर्च उमेदवार ग्राह्य धरत आहेत. डॉ. विखे यांच्यासाठी पंतप्रधान नरेंद्र मोदी यांची सभा झाली. या सभेसाठी तब्बल ३५ लाख रुपये खर्च झाला आहे. हा खर्च युतीच्या दोन उमेदवारांमध्ये विभागण्यात आलेला आहे. तर राष्ट्रवादीचे उमेदवार जगताप यांच्यासाठी राष्ट्रवादीचे अध्यक्ष शरद पवार, प्रदेशाध्यक्ष जयंत पाटील, विधान परिषदेचे विरोधी पक्षनेते धनंजय मुंडे, माजी मंत्री छगन भुजबळ यांच्या सभा झालेल्या आहेत. निवडणूक आयोगाने डॉ. विखे यांचा खर्च ५१ लाख ८९ हजार रुपये, तर संग्राम जगताप यांचा ४२ लाख ४० हजार रुपये खर्च निश्चित केला आहे. अपक्ष उमेदवार संजीव भोर यांनी २ लाख ७८ हजार, तर बहुजन समाज पक्षाचे अॅड. नामदेव वाकळे यांनी ८९ हजार रुपये खर्च केला आहे. हा खर्च उमेदवारांनी मान्य केला आहे. आता उर्वरित दिवसांचा खर्च मतमोजणीनंतर महिनाभरात सादर करायचा आहे.
इतर उमेदवारांनी सादर केलेला खर्च
उमेदवार खर्च
सुधाकर आव्हाड २ लाख १६ हजार
कमल सावंत १ लाख १० हजार
ज्ञानदेव सुपेकर १ लाख ४ हजार
कलीराम पोपळघट २५ हजार ८००