खंडणी मागणारा तोतया पत्रकार जेरबंद

नगरः बेहिशोबी मालमत्तेची माहिती वृत्तवाहिनीवर दाखविण्याची धमकी देऊन व्यापाऱ्याला २५ लाख रुपयांची खंडणी मागणाऱ्या एका तोतया पत्रकाराला पोलिसांनी अटक केली आहे. एका बड्या वृत्तवाहिनीचा पत्रकार असल्याची बतावणी करून खंडणी मागणाऱ्या या तोतया पत्रकाराचे नाव अजीज बाबू इनामदार असे आहे.

नगरमधील व्यावसायिक लॉरेन्स स्वामी यांच्याकडे इनामदारने २५ लाखांची खंडणी मागितली. तुम्ही अवैध संपत्ती जमविली असून तुमच्या संपत्तीची माहिती वृत्तवाहिनीवर दाखवून ईडीमार्फत चौकशी लावतो, अशी धमकी त्याने स्वामींना फोनद्वारे दिली होती. हे प्रकरण मिटवायचे असेल तर २५ लाख रुपये देण्याची मागणीही त्याने केली. त्यामुळे घाबरलेल्या स्वामी यांनी इतर पत्रकारांकडे इनामदारबाबत चौकशी केली असता तो तोतया पत्रकार असल्याचे समोर आले. त्यानंतर स्वामी यांनी पोलिसांना त्याबाबतची माहिती दिली.

सोमवारी रात्री स्वामी यांनी इनामदारला खंडणीची रक्कम घेण्यासाठी हॉटेल ग्रँड दरबार येथे बोलविले होते. या ठिकाणी आधीच दबा धरून बसलेल्या पोलिसांनी इनामदारला खंडणीची रक्कम घेताना रंगेहात पकडले. पोलिसांनी त्याच्याकडून प्रेसची दोन ओळखपत्रे, एक माइक, एक कॅमेरा आदी साहित्य जप्त केले आहे. त्याच्याविरुध्द भिंगार कॅम्प पोलीस स्टेशनमध्ये खंडणीचा गुन्हा नोंदविण्यात आला आहे. याप्रकरणात आणखी एका तोतया पत्रकारांचा समावेश असून पोलीस त्याचाही शोध घेत आहेत.