म. टा. वृत्तसेवा, कर्जत
नीरव मोदी याच्या नगर कर्जत तालुक्यातील खंडाळा येथील जमिनीवर शेतकऱ्यांनी शनिवारी सकाळी पुन्हा एकदा आंदोलन केले. मोदीच्या येथील सोलर प्लांटचे नामांतर 'डल्ला भगोडा सोलर प्लांट' असे करण्यात आले व रिझर्व बँकचे माजी गव्हर्नर यांचा पुतळा झाडाला बांधून त्यावर चाबकाने आसूड ओढले. काँग्रेसचे तालुकाध्यक्ष किरण पाटील व अॅड. कारभारी गवळी यांनी या आंदोलनाचे नेतृत्व केले. जलतज्ञ मिलिंद बांगल, प्रकाश थोरात, भीमराव खेडकर, सोन्याबापू गोयकर, संतोष माने, यशवंत खेडकर आदीं ग्रामस्थ या आंदोलनामध्ये सहभागी झाले होते.
शेतकऱ्यांना आमिष दाखवून अल्प दरात जमिनी लाटणाऱ्या व बँकाना कोट्यवधी रुपयांचा गंडा घालणाऱ्या हिरे व्यापारी नीरव मोदी याला ज्या बँकांनी कर्ज दिले त्याचे ऑडिट न करता डोळेझाक करणाऱ्या रिझर्व्ह बँकेचे (आरबीआय) गव्हर्नर यांच्यावर कारवाई करण्याची मागणी 'काळी आई मुक्ती संग्राम आंदोलन'च्या वतीने करण्यात आली.
शनिवारी डॉ. बाबासाहेब आंबेडकर यांच्या जयंतीदिनी रिझर्व्ह बँकेच्या गव्हर्नरांची प्रतिमा झाडाला बांधून शेतकऱ्यांच्या आसुडाचे फटके ओढून प्रतीकात्मक पद्धतीने आंदोलन करण्यात आले. नुकतीच कर्जत तालुक्यातील खंडाळा गावातील ग्रामस्थांची बैठक होऊन, मूळ शेतकऱ्यांना त्यांची जमीन परत मिळण्यासाठी आंदोलनाचा निर्णय झाला होता. डॉ. बाबासाहेब आंबेडकर जयंती दिनी हे आंदोलन करण्याचे आले. सर्व स्थानिक शेतकरी व महिला येथे एकत्र आले यांनी भारत माता की जय, नीरव मोदी मुर्दाबाद, अशा घोषणा दिल्या. यांनतर सोलर प्लांट येथे नामांतर कार्यक्रम झाला. या वेळी किरण पाटील यांनी सरकारच्या धोरणावर जोरदार हल्ला केला.
हिरे व्यापारी नीरव मोदीने खंडाळा येथील सुमारे अडीचशे एकर जमीन गहाण ठेवून युनियन बँक ऑफ इंडियाकडून २४ फेब्रुवारी २०१२ रोजी आठ दशलक्ष अमेरिकी डॉलर म्हणजे ५२ कोटी रुपये कर्ज मिळवले; मात्र, बँका जमीन गहाण ठेवून एक लाख रुपयाचे कर्जदेखील शेतकऱ्यांना द्यायला तयार नाहीत. पंजाब नॅशनल बँकेचे ऑडिट रिझर्व्ह बँकेने केले नसल्याने हा फसवणुकीचा प्रकार घडला आहे. बँकेने शहानिशा न करता नीरव मोदीला जमीन भावाच्या कितीतरी पटीने अधिक कर्ज दिले. रिझर्व्ह बँकेने आपली भूमिका चोख पार पाडली असती तर हे प्रकरण घडले नसते; मात्र, या प्रकरणाने रिझर्व्ह बँकेचा ढिसाळ कारभार चव्हाट्यावर आला असल्याचे अॅड. कारभारी गवळी यांनी म्हटले आहे. तसेच या जमिनीवर पन्नास एकरवर उभारण्यात आलेल्या सोलर हार्वेस्टिंग वीजनिर्मिती प्रकल्पाचे 'डल्ला भगोडा सोलर पार्क' असे नामांतर करून, या प्रकल्पाच्या उत्पन्नाची रॉयल्टी मूळ शेतकऱ्यांना देण्याची मागणी केली जाणार आहे, असे किरण पाटील या वेळी म्हणाले.
फोटो ओळ :
कर्जत तालुक्यातील खंडाळा येथील नीरव मोदी याच्या सोलर प्लांटचे नामांतर करण्यात आले. (छाया : गणेश जेवरे)