रुईछत्तीशीमध्ये शेतकऱ्याची आत्महत्या

नगर : नगर तालुक्यातील रुईछत्तीशी येथील बाळासाहेब गणपत गोरे (वय ५१) या कर्जबाजारी शेतकऱ्याने शेतातील लिंबाच्या झाडाला गळफास घेऊन आत्महत्या केली. रविवारी (१० डिसेंबर) सकाळी ११च्या सुमारास ही घटना लक्षात आली. त्यांच्यामागे पत्नी, दोन मुले व एक मुलगी असा परिवार आहे.

गोरे यांनी शेतीसाठी कर्ज घेतले होते. ते भरता येणे शक्य नसल्यानेच त्यांनी आत्महत्या केली असावी, अशी शक्यता स्थानिकांनी व्यक्त केली. गोरे यांचे जावई भरत भाऊसाहेब भुजबळ यांनी नगर तालुका पोलीस ठाण्यात खबर दिली. सायंकाळी जिल्हा रुग्णालयात शवविच्छेदन करण्यात आल्यानंतर मृतदेह नातेवाईकांच्या ताब्यात देण्यात आला. तालुका पोलीस ठाण्यात या प्रकरणी अकस्मात मृत्यूची नोंद करण्यात आली असून, गोरे यांच्यावर कुठल्या वित्तीय संस्थांचे किती कर्ज होते, याबाबतचा तपास करण्यात येत आहे.