'बसप'चा दोघांसह स्वतंत्र गट, कायद्याचा कीस पडण्याची चिन्हे
म. टा. प्रतिनिधी, नगर
महापालिकेतील पाचव्या स्वीकृत नगरसेवकपदासाठी जोरदार राजकीय रस्सीखेच सुरू आहे. आधी काँग्रेसच्या वाट्याला जाणारे हे नगरसेवकपद राष्ट्रवादीने आपल्याकडे खेचले होते, पण आता त्यावर कडी करीत बहुजन समाज पक्षाने दोन नगरसेवकांसह स्वतंत्र गट करून स्वीकृत नगरसेवकपद मिळवण्यासह स्थायी आणि महिला व बालकल्याण समितीत प्रत्येकी दोन सदस्य घुसवण्याची तयारी सुरू केली आहे. बसपच्या या प्रयत्नांवर येत्या सोमवारी (१४ जानेवारी) नाशिक विभागीय आयुक्तांद्वारे अंतिम निर्णय होणार आहे. दरम्यान, स्वीकृत नगरसेवक निवडीसाठी महापौर निवडीनंतर महिनाभराच्या महासभा गरजेची असली तरी महापौर बाबासाहेब वाकळेंकडून अद्याप तशा हालचालीचे आदेश प्रशासनाला दिले गेलेले नाहीत.
६८ सदस्यांच्या महापालिकेत स्वीकृत नगरसेवकपदाच्या पाच जागा आहेत. पक्षनिहाय मिळालेल्या जागानुसार स्वीकृत नगरसेवक नियुक्त करता येतात. महापालिका निवडणुकीच्या निकालानंतरच्या संख्याबळानुसार शिवसेनेला २ आणि भाजप, काँग्रेस व राष्ट्रवादीला प्रत्येकी १ स्वीकृत नगरसेवक निवडता येणार होता. मात्र, त्यानंतर विभागीय आयुक्तांकडील पक्षीय गटनोंदणीत राष्ट्रवादीने एका अपक्षासह नोंदणी केल्याने काँग्रेसची संधी जाऊन राष्ट्रवादीला दुसरा स्वीकृत नियुक्तीची संधी मिळाली होती. पण आता बहुजन समाज पक्षाचे नगरसेवक मुदस्सर शेख, अश्विनी जाधव, अनिता पंजाबी व अक्षय उनवणे यांनी स्वतःच्या स्वतंत्र चार जणांच्या पक्षीय गट नोंदणीव्यतिरिक्त नव्या 'बहुजन समाज पार्टी-समाजवादी पार्टी व अपक्ष विकास आघाडी'च्या गटनोंदणीचा प्रस्ताव विभागीय आयुक्तांकडे दिला आहे. य़ात त्यांनी समाजवादी पक्षाचे आसिफ सुलतान व अपक्ष मीनाज खान यांचा समावेश केला आहे. या गटाची नोंदणी झाली तर ६ जणांच्या या गटाला स्वीकृत नगरसेवक नियुक्तीची पाचवी संधी मिळणार आहे. गटनोंदणीच्या मुदतीतच या नव्या गट नोंदणीचा प्रस्ताव दाखल झाला असला तरी येत्या सोमवारी (१४ जानेवारी) नाशिक विभागीय आयुक्त महापालिका कायद्यातील तरतुदी पाहून यावर अंतिम निर्णय देणार आहेत. स्वीकृत नगरसेवक निवडीचे रंगलेले राजकारण पाहता 'मटा'ने १३ डिसेंबर २०१८च्या अंकात 'पाचवा स्वीकृत नगरसेवक ठरणार कळीचा' असे दिलेले वृत्त खरे ठरण्याची चिन्हे दिसू लागली आहेत.
कायद्याचा कीस पडणार
महापालिकेच्या आतापर्यंतच्या १५ वर्षांच्या वाटचालीत एकाचवेळी दोन-दोन महापौर, गटनेता खरा की खोटा अशा विविध मुद्द्यांवर कायद्याचा कीस पाडला गेला आहे. तशी वेळ आता पुन्हा येण्याची चिन्हे आहेत. राष्ट्रवादीच्या १८ सदस्यांच्या गटनोंदणीत अपक्ष मीनाज खान यांचीही १९वा सदस्य म्हणून नोंदणी झाली असताना आता त्यांनी पुन्हा बहुजन समाज पक्षाच्या स्वतंत्र गटातही सहभाग घेतल्याने यापैकी कोणत्या ठिकाणची त्यांची नोंदणी कायदेशीर ठरते, यावर कायद्याची लढाई रंगण्याची चिन्हे आहेत. अर्थात १४ जानेवारीच्या निर्णयानंतरच व प्रत्यक्ष स्वीकृत नगरसेवक नियुक्तीच्या वेळी यावर वाद झडू शकतो. पण महापालिकेचे राजकीय चित्र पाहता भाजपच्या महापौराला राष्ट्रवादी व बहुजन समाज पक्षाच्या नगरसेवकांनीच मतदान केले असल्याने सत्तेत बेबनाव नको म्हणून राष्ट्रवादी व बसपमध्ये मांडवली घडवण्याची किमया भाजप सत्ताधाऱ्यांकडून होऊ शकते, अशीही जोरदार चर्चा आहे.
अपूर्णांकावर खेळ
महापालिका सभागृहाचे ६८ सदस्य असताना व ५ स्वीकृत नगरसेवक घ्यायचे असल्याने ६८ ला ५ ने भागाकार केल्यानंतर प्रत्येक स्वीकृत नगरसेवकाचे मूल्य १३.६ होते. सेनेचे २४ सदस्य असल्याने त्यांना १३.६ने भागल्यावर १.७६ संख्या येते. अशा पद्धतीने राष्ट्रवादीचे १८ नगरसेवक असल्याने त्यांची १.३२, भाजपचे १४ नगरसेवक असल्याने त्यांची १.०२, काँग्रेसच्या ५ सदस्यांची ०.३६ व बहुजन समाज पक्षाच्या ४ सदस्यांची ०.२९ संख्या होते. यातील पूर्णांकाचा विचार करून सेना, राष्ट्रवादी व भाजपला प्रत्येकी १ स्वीकृत सदस्य पहिल्या फेरीत मिळणार आहे. दुसऱ्या फेरीत पक्षांच्या पक्ष संख्येतील अपूर्णांकाचा विचार करून उतरत्या क्रमाने मोठा अपूर्णांक असलेल्या दोन पक्षांना राहिलेल्या दोन जागा दिल्या जाणार आहेत. सेनेकडे ०.७६ अपूर्णांक असल्याने त्यांना चौथा स्वीकृत नगरसेवक मिळणार आहे. पण पाचव्या अपूर्णांकाची रस्सीखेच सुरू आहे. राष्ट्रवादीने १९जणांची गटनोंदणी केल्याने त्यांचा अपूर्णांक ०.३९ झाला आहे व तो काँग्रेसच्या ०.३६पेक्षा जास्त असल्याने काँग्रेसला मिळणारी संधी राष्ट्रवादीकडे गेली होती. पण आता बहुजन समाज पक्षाने सहा जणांची नोंदणी केल्याने व त्यांच्या या स्वतंत्र गटाला मान्यता मिळाली तर त्यांची अपूर्णांक संख्या ०.४४ होऊन पाचवा स्वीकृत नियुक्तीचा मान त्यांच्याकडे जाण्याची शक्यता आहे.