नगर : ज्युनिअर कॉलेजांनी अकरावीला प्रवेश देताना नियमांचे पालन केले आहे का, कॉलेजांना मंजूर केलेल्या जागांपेक्षा जादा प्रवेश दिले आहेत का, याची तपासणी करण्यासाठी शिक्षण विभागाने चार भरारी पथके नेमली आहेत. पुढील आठवड्यापासून या पथकांकडून तपासणीचे काम हाती घेण्यात येणार आहे.
अकरावीला प्रवेश देताना काही ज्युनिअर कॉलेजांनी क्षमतेपक्षा जादा विद्यार्थ्यांना प्रवेश दिल्याच्या तक्रारी आल्या होत्या. त्यानंतर शिक्षण संचालकांच्या आदेशानुसार कॉलेजांची तपासणी करण्यासाठी शिक्षण विभागाने भरारी पथके नेमली आहेत. या पथकात तीन प्राचार्य असून, माध्यमिक विभागाचे शिक्षणाधिकारी त्याचे अध्यक्ष असणार आहेत. भरारी पथके पुढील आठवड्यात तालुकानिहाय ज्युनिअर कॉलेजांची तपासणी करणार असून, ज्या कॉलेजांनी कोणतीही पूर्वपरवानगी न घेता मंजूर क्षमतेपेक्षा जादा प्रवेश दिले आहेत, त्यांची यादी तयार करणार आहेत; तसेच तपासणीनंतरचा सविस्तर अहवाल तयार करून तो शिक्षण विभागाला देण्यात येणार आहे.
.....
भरारी पथक नेमण्याचे काम पूर्ण झाले असून, पुढील आठवड्यापासून कॉलेजांची तपासणी सुरू करण्यात येणार आहे. लवकरात लवकर तपासणीचे काम पूर्ण व्हावे, या दृष्टीने नियोजन करण्यात आले आहे.
- लक्ष्मण पोले, शिक्षणाधिकारी
.....