अ‍ॅपशहर

फरार आरोपीसह पाच जण जेरबंद

मोक्कातील फरार आरोपी गिरीष आलम काळे (रा. निघोज, ता. पारनेर) याच्यासह त्याच्या चार साथीदारांना स्थानिक गुन्हे शाखेने शनिवारी गजाआड केले.

Maharashtra Times 17 Dec 2017, 3:00 am
म. टा. प्रतिनिधी, नगर
महाराष्ट्र टाइम्स.कॉम five accused arrested along with absconding
फरार आरोपीसह पाच जण जेरबंद

मोक्कातील फरार आरोपी गिरीष आलम काळे (रा. निघोज, ता. पारनेर) याच्यासह त्याच्या चार साथीदारांना स्थानिक गुन्हे शाखेने शनिवारी गजाआड केले. सुपा ते अस्तगाव रोडवर रायतळे शिवारात पहाटेच्या सुमारास ही कारवाई करण्यात आली. आरोपींकडून एक लोखंडी सुरा, दोन लोखंडी गज, मिरची पूड, तीन मोबाईल असा मुद्देमाल जप्त करण्यात आला आहे. दरम्यान, अंधाराचा फायदा घेऊन तेथे असणारे इतर तीन आरोपी पळून जाण्यात यशस्वी झाले आहेत.
पोलिस अधीक्षक रंजनकुमार शर्मा, अप्पर पोलिस अधीक्षक घनश्याम पाटील, सहायक पोलिस अधीक्षक मनिष कलवानीया यांच्या मार्गदर्शनाखाली स्थानिक गुन्हे शाखेचे पोलिस निरीक्षक दिलीप पवार हे आपल्या पथकासह सुपा पोलिस स्टेशनच्या हद्दीमध्ये स्थानिक गुन्हे शाखा पुणे ग्रामीण यांच्यासोबत संयुक्तरित्या कोंबिंग ऑपरेशन राबवण्यासाठी गेले होते. ऑपरेशन राबवून परत निघण्याच्या तयारीत असताना पोलिस निरीक्षक पवार यांना रायतळे शिवारात घाटच्या लवनात लिंबाच्या झाडाच्या बाजूला असणाऱ्या ओढ्यामध्ये मोक्कामध्ये फरार असणारा आरोपी गिरीष आलम काळे हा त्याच्या साथीदारांसह दरोडा टाकण्याच्या उद्देशाने दबा धरून बसला असल्याची माहिती मिळाली. त्यानंतर पवार यांनी रायतळे शिवारात जाऊन आपल्या कर्मचाऱ्यांच्या मदतीने दरोड्याच्या तयारीत असणाऱ्या गिरीष आलम काळे, किशोर मंत्री चव्हाण (वय २९) , नवनाथ हातण्या भोसले (वय २३ दोघे रा. वाघुंडे बु, ता.पारनेर), दत्तु अरुण भोसले (वय ३०, रा. पिंपळगाव पिसा, ता.श्रीगोंदा), गंगाधर संदल चव्हाण (वय १९, रा. सुरेगाव, ता.श्रीगोंदा) यांना ताब्यात घेतले.

यावेळी पकडलेल्या आरोपींचे साथीदार देवा उर्फ पावल्या कैलास काळे, तुषार कैलास काळे व शरद कैलास काळे (सर्व रा.पाडळी, ता.पारनेर) हे अंधाराचा फायदा घेऊन पळून जाण्यात यशस्वी झाले. दरम्यान, स्थानिक गुन्हे शाखेने पकडलेले आरोपी हे सराईत गुन्हेगार असून त्यांच्याविरुद्ध जिल्ह्यातील विविध पोलिस स्टेशनमध्ये गुन्हे दाखल आहेत.

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज